Aqtóbelik muǵalim qazaq tilinde esep shyǵarý kanalyn ashty
Ǵalymjan Tóleýshov Aqtóbe qalasynda bilim alyp, mektep bitirgen soń Nur – Sultan qalasynda ulttyq ýnıversıtette oqydy. Keıin «Bolashaq» baǵdarlamasymen tájirıbe jınady. Hımııa ǵylymdarynyn magıstri, Ulybrıtanııada tájirıbe almasý kýrsynyn katysýshysy, halyqaralyq IELTS sertıfıkaty – 7.5. Sonymen qatar qazaq ádebıetine degen qyzyǵýshylyǵy zor, óleń shyǵarady. Shetelde bilim alyp kelgen soń elordadaǵy joǵary oqý ornynda dáris berdi. Keıin ata-anasynyń janyna kelip, mektepke jumysqa ornalasty.
«Alǵashynda taqyryptyq esepterge suranys joǵary boldy. Qazir UBT suraqtaryna basymdyq berilip jatyr. YouTube vıdeohostıngindegi kanalda biryńǵaı qazaq tilinde vıdeo salyp júrmin. Aptasyna bir ret baılanysqa shyǵamyn. Bir vıdeoda 5-6 eseptiń sheshimi bolady. 10 mınýttan asyp ketse, adamdar jalyǵyp ketedi», - dedi ol. Jas mamannyń «ChemEasy – hımııa bizben jeńil» YouTube kanalynda biryńǵaı qazaq tilinde onlaın sabaq men eksperıment júrgizgenine bir jyldan asty. Bul ıdeıa 12 synyp oqýshylaryn Kembrıdj halyqaralyq emtıhanyna daıyndaý barysynda týyndaǵan. Ustaz bastapqy ýaqytta vıdeolar aǵylshyn tilinde túsirilgenin, keıin qazaq tiline kóshkenin aıtty.
«Aǵylshyn tilindegi materıaldardyń keń aýqymyn baıqadym. Al hımııa pánin oqytatyn qazaqsha kanaldar joqtyn qasy jáne aqyly. Saraptamadan soń ana tilimizde shaǵyn vıdeolardan turatyn qoljetimdi kontent jasaýdy uıǵardym. YouTube jelisiniń aqparattyq rólin ǵana qarastyryp qoımaı, oqytý resýrsy retinde bilimniń damýyna jol ashatynyń atap ótý kerek», – deıdi aqtóbelik ustaz. Zııatkerler ózderine qyzyqty taqyryptardy usynady, kanaldy árlendirý joldarymen kómektesedi. Aldaǵy ýaqytta aǵylshyn tilinde NUFIPET, SAT emtıhandary baǵytynda jańa vıdeolar túsirý josparda bar. Kanalǵa 750 adam jazylǵan. Qoldanýshylardyń jasy 13 pen 24 jas aralyǵynda.
«Jospar boıynsha aqparattyq portal ashyp, kúndelikti sabaǵymdy onlaın ótkizgim keledi. Bir jyldan soń iske asyryp, jańa baǵytty qamtýdy maqsat ettim», - dedi ol.
