Aqtóbelik muǵalim balasy úshin túıe sharýashylyǵyn qolǵa aldy
AQTÓBE. QazAqparat - Aqtóbeniń Mártók aýdany Sarjansaı aýylynyń turǵyny Aısulý Ábıtova túıe sharýashylyǵyn qolǵa aldy. Ustaz aldymen bıznes álippesin úırenip, keıin balasynyń emi úshin túıe satyp aldy, dep habarlaıdy QazAqparat tilshisi.
Aqtóbe oblysynda Shalqar, Baıǵanın aýdandary túıe sharýashylyǵyn damytyp otyr. Al egindi aýdandarda túıe baǵatyn adamdar az. Aısulý Ábıtova da shóbi shúgin Mártók aýdany, Sarjansaı aýylynda turady. Informatıka pániniń muǵalimi balasyn emdeýdiń bir joly shubat ishý dep bildi.
«Balam jıi aýyryp, dárige emes, halyq emine júginýdi jón kórdim. Dáriniń bir paıdasy bolsa, zııany da jetkilikti. Sondyqtan ımmýnıtetin kóterip, tózimdiligin arttyrý úshin úlkenderdiń aıtýymen shubat ishkizgim keldi. Alǵashynda óńirimizdegi Shalqar aýdanynan arnaıy aldyryp, balama úzbeı shubat berdim. Keıin túıe baǵyp, qajetti shubat daıyndaýǵa ózimniń de múmkindigim bar ekenin túsindim. Bul kásip, sondyqtan aldymen bilim aldym. Aýdan turǵyndaryna arnalǵan «Bastaý» baǵdarlamasy arqyly kásipkerlik álippesin úırenip, qosymsha tabysqa qol jetkizýge bolatynyn túsindim», - dedi aýyl turǵyny Aısulý Ábıtova.
Ol qazir bala kútimimen úıinde otyr. Aýyldan aýdan ortalyǵyna baryp, bıznes trener Jumagúl Maqashevanyń kómegine júgindi. Bıznes joba túıe sharýashylyǵyn damytýǵa jasaldy.
«Bir aılyq kýrsty aıaqtap, «Aýylsharýashylyǵyn qoldaý qory» AQ oblystyq fılıaly arqyly 3 mıllıon teńge nesıe rásimdedim. Qarjyǵa úsh túıe satyp aldym. Qazirgi kezde ózimiz shubat ishemiz, «Aısulý» jeke kásipkeri saýda markasymen dúkenge satýǵa qoıdym. Aýyl turǵyndary kúnde alady, toıǵa tapsyrys beredi. Aldaǵy ýaqytta taǵy 3 túıe satyp alamyn», - dedi ol.
Statıstıkalyq málimetke súıensek, ótken jyly Aqtóbe oblysynda 18 myńnan asqan túıe bar. Onyń 12 myńnan astamy Shalqar aýdanynda, 3 myń bas túıe Baıǵanın aýdanynda ósiriledi. Al Qarǵaly aýdanynda túıe múldem joq.
