Aqtóbelik metallýrgter vaktsına qabyldap jatyr
AQTÓBE. QazAqparat - Aqtóbe ferroqorytpa zaýyty men Dóń ken-baıytý kombınatynyń jumysshylary vaktsına qabyldap jatyr, dep habarlaıdy QazAqparat tilshisi.
Aqtóbelik metallýrgter kún saıyn vaktsına qabyldap jatyr. 4 myńnan asa adam jumys isteıtin Aqtóbe ferroqorytpa zaýytynda qyzmetkerlerdiń 40,6% nemese 1676 adam alǵashqy kompenentti alsa, ekinshi komponentti 27,4% nemese 1132 adam qabyldady. Al Dóń ken-baıytý kombınatynda alǵashqy komponentti 10,1% nemese 720 adam saldyrdy, ekinshisin – 5,8% nemese 414 adam aldy. Aqtóbe ferroqorytpa zaýytynyń birinshi balqytý tsehynda rekordtyq kórsetkishke qol jetkizdi. Munda qyzmetkerdiń 77% vaktsına alǵan. Aqtóbe ferroqorytpa zaýytyndaǵy jaqsy kórsetkish óz nátıjesin berip jatyr. Munda koronavırýs juqtyrǵandar sany tómendedi.
- COVID-19-ǵa qarsy vaktsına alý nemese almaý – bul árkimniń jeke sharýasy. Biraq zaýyt qyzmetkerleriniń bul máselege jaýapkershilikpen qarap, ekpe alyp jatqandaryna rızamyn. Árkim óziniń jáne jaqyndarynyń densaýlyǵyna jaýapty. Muny esten shyǵarmaǵan jón», - deıdi «Qazhrom» TUK» AQ prezıdenti Arman Esenjolov.
Jumysshylar medıtsına ortalyǵynda jáne zaýyt aýmaǵyndaǵy medıtsına bólmesinde vaktsına alyp júr. Sondaı-aq, kompanııa basshylyǵy 22-maýsymnan bastap ekpe alǵan qyzmetkerlerdiń eńbek demalysyna 1 kún qosýǵa sheshim qabyldady. Medıtsına ortalyǵynyń qyzmetkerleri turaqty túrde tsehtardy aralap, ujymdarymen kezdesedi, ekpe alýdyń qajettiligi men syrqattyń saldary týraly aıtyp júr.
