Aqtóbelik maıdanger basyndaǵy oqpen 15 jyldan astam ýaqyt boıy júrgen
QR Ulttyq ulany «Batys» óńirlik qolbasshylyǵynyń baspasóz hatshysy, podpolkovnık Erbolat Sultanovtyń aıtýynsha, qazirgi kezde Aqtóbe qalasynda Ekinshi dúnıejúzilik soǵysqa qatysqan 25-teı maıdanger turady.
«Biz – Jeńistiń muragerlerimiz!» atty respýblıkalyq estafeta aıasynda 6655-áskerı bólim jaýyngerleri aqtóbelik soǵys ardagerleri turatyn úılerdiń aldynan sherýletip júrip ótip, qurmet kórsetti. Áskerı orkestr maıdan ánderin oryndady.
«Batys» óńirlik qolbasshysynyń tárbıe jáne áleýmettik-quqyqtyq jumystar jónindegi orynbasary, podpolkovnık Baqyt Alazov maıdangerlerge QR Іshki ister mınıstriniń atynan alǵys hattar, sondaı-aq gúl shoqtary men eskertkish syılyqtar tabys etti.
Ǵızat Toqtabaev úıine kelgen meımandarǵa áskerı joly týraly áńgimelep berdi. 1942 jyly aldyńǵy shepte bolǵan Ǵızat Muhtaruly shabýylǵa alǵashqylardyń biri bolyp kóteriledi. Sol sátte basynan oq tıedi. Ony óldige sanap, orman ishinde jerleýge qaldyrady. Áıtse de sý isherligi bar eken, onyń tiri ekenin bilgender gospıtalǵa jetkizedi. Onda bastyń ishindegi oqty ala almaıdy. Emdelip shyqqannan keıin ol baılanysshy qyzmetin atqarady. Soǵys bitkennen soń 15 jyldan keıin ǵana Ǵ.Toqtabaevtyń basyndaǵy jaryqshaq alynady. Sol kezde «Bul – tańǵajaıyp jaǵdaı», dep dárigerler bas shaıqaǵan eken.
Ulttyq ulan jaýyngerleri quttyqtaǵan maıdangerdiń biri Borıs Ivanovıch Konıýshenko 92 jasta. Jasy jetpese de, Stalınge hat jazyp, áskerge alynǵan ol Qytaıda arnaıy tapsyrmamen qyzmet etti. 1949 jyly elge oralǵannan keıin 44 jyl boıy Aqtóbe áýejaıynda eńbek etti. Qazirgi kezde zaıyby, 43 jyl boıy radıst bolǵan Elena Pavlovnamen birge eki nemeresin tárbıeleýde.
Taǵy bir maıdanger Mıhaıl Ivanovıch Dıdenko ásker qataryna 17 jasynda 1943 jyly shaqyrylǵan. 3-Belorýs maıdany 92-atqyshtar dıvızııasy 31-batalony quramynda pýlemet raschetiniń komandıri bolǵan M.Dıdenko Vılnıýs, Kaýnas, Prýssııadaǵy keskilesken urystarǵa da qatysady. «Qyzyl Juldyz» ordeni, «Jaýyngerlik eńbegi úshin» medalimen marapattalǵan maıdanger soǵystan keıin ishki ister organdarynda qyzmet etti. Ol da ózine qurmet kórsetken Ulttyq ulan jaýyngerlerine rızashylyǵyn bildirdi.
Eske sala keteıik, budan buryn Ulttyq ulannyń 100-den astam sarbazy Oralda maıdanger úıiniń aldynda sherý uıymdastyrǵanyn jazǵan bolatynbyz.
