Aqtóbelik mamandar 1 mln túp kóshettiń nelikten qýrap qalǵanyn aıtty
Aqtóbe oblysynyń ákimdigi 1 myń ga jerge egilgen kóshetterdiń qýrap qalǵanyn rastap otyr. Mamandar qalalyq ákimdik egý jumysyn bastaǵanda eskertý bergenin, biraq olardyń qulaq aspaǵanyn aıtyp berdi.
«Aqtóbe qalasynyń ákimdigi 2017 jyly 1 mıllıon 200 túp kóshet egýdi josparlady. Qazir aǵash tolyq shyqpaı qaldy dep aıtýǵa bolady. Qatelik kóp. Aldymen jobany orman sharýashylyǵy salasynyń mamandary ázirlemegen. Topyraq qabaty zerttelmegen, otyrǵyzý tehnologııasy saqtalmaǵan. Ári aǵashtar ýaqytynan kesh egildi. Tehnologııa boıynsha bir jyl buryn topyraq daıyndalýy tıis edi. Sonymen qatar, jergilikti klımatqa beıimdelmegen ekpeler otyrǵyzylǵan eken. Qala aýmaǵyndaǵy jasyl jelekti otyrǵyzý, olardy kútý jumystaryna jergilikti atqarýshy organ jaýapty. Keıin bilip, eskertý jasaldy. Biraq olar óz betinshe otyrǵyzdy», - deıdi Aqtóbe oblystyq tabıǵı resýrstar jáne tabıǵat paıdalanýdy retteý basqarmasy orman sharýashylyǵy bóliminiń basshysy Ǵabıt Qylyshbaev.
Aıta keteıik, Aqtóbe oblysynda orman sharýashylyǵy mekemesiniń kúshimen 3 myń ga jasyl aımaq qurý jospary daıyndalady. Aldaǵy ýaqytta kóshet qýraǵan aýmaq qaıta óńdelip, sol jerge egý jumysy qaıta júrýi múmkin.
