Aqtóbelik maman eń úzdik memlekettik qyzmetshi atandy
Qubaıbergen Jubanov atyndaǵy Aqtóbe memlekettik ýnıversıtetiniń fılologııa fakýltetin bitirgen Nurgúl Bertileýova eńbek jolyn mektep-gımnazııada bastady. Qazaq tili men ádebıeti páninen sabaq bergen ustaz bir mektepte 9 jyl boıy eńbek etti. Sol kezde-aq aldyńǵy qatardan kóringen ustaz qalanyń, oblystyń, tipti respýblıkanyń eń úzdik ustazy atandy. Bilim ordasynyń qabyrǵasynda sheberlik klasy ashylyp, bul ortalyq oblys muǵalimderiniń tájirıbe jınaıtyn alańyna aınaldy.
«Mektepte júrgende shákirtterim qalalyq, oblystyq, respýblıkalyq olımpıadalarda jeńimpaz atandy. Pedagog bolý unady, degenmen basqa salada da eńbek etip, tájirıbe jınaýdy jón kórdim.Sodan 2007 jyly memlekettik qyzmetke jumysqa turdym. Oblystyq tilderdi damytý basqarmasynyń tilderdi damytý jáne úılestirý bóliminiń basshysy qyzmetinde on jyldan beri eńbek etip kelemin. Osy salada turaqtap, ári qaraı tabysty jumys isteýdi josparlap otyrmyn. Eń úzdik memlekettik qyzmetshilerdi anyqtaıtyn baıqaýǵa kásibı sheberligimdi dáleldeý úshin qatystym. Oblystyq kezeńde biz «Nátıjeli kásibı memlekettik apparatty qalaı qurýǵa bolady?» degen taqyrypta esse jazyp, úzdikter irikteldi. Men essede memlekettik qyzmetshilerdiń bilimin jetildirýge kóp mán berý kerek ekenin usyndym. Biz úsh jyl saıyn memlekettik qyzmetshilerdiń biliktiligin arttyrý kýrstaryna qatysamyz. Osy salany jetildirip, jańalyqty der kezinde bilip otyrý, ІT tehnologııa jıi qoldanýdy aıttym. Sonymen qatar, memlekettik qyzmetshilerdiń jeke kitaphanasy, arnaıy lektorlardyń bolýy kerek. Ári menedjment, kóshbasshylyq qabiletti jetildirý usynyldy», - dedi Aqtóbe oblystyq tilderdi damytý basqarmasynyń bólim basshysy Nurgúl Bertileýova.
Aıta keteıik, oblys boıynsha barlyǵy 300-den astam memlekettik qyzmetshi baıqaýǵa qatysyp, úzdikteri irikteldi. Óńirden barlyǵy 2 adam respýblıkalyq kezeńde baq synady. Bul joly da Nurgúl Bertileýova óziniń úzdik memlekettik qyzmetshi ekenin dáleldep shyqty.
«Respýblıkalyq konkýrsta kásibı, ómirlik ustanymyń týraly aıtyp, óz-ózińdi tanystyrý talaby qoıyldy. Keıin baıqaýǵa qatysýshylar kreatıvti túrde dóńgelek ústel, semınar, konferentsııa ótkizip, turǵyndardy qabyldady. Bári el zańnamalaryna saı bolýy tıis. Bul kezeń men úshin qıyn bolmady. Arnaıy daıyndyq ta júrgizilmedi. Sebebi bul bizdiń kúndelikti jumysymyz. Memlekettik qyzmetti basqa salamen salystyrýǵa bolmaıdy. Osy salada eńbek etip júrgen qyzmetshi biz arqyly búkil memleketke degen kózqaras qalyptasatynyn uǵynýy kerek. Adaldyq, jaýapkershilik, ádildik, shynaıylyq, belsendi ómirlik kózqaras, kásibı bilim men biliktilik. Osy qasıetter boıǵa darymasa memlektetik qyzmettegi ómiriń uzaqqa barmaıdy»,- dedi elimizdiń eń úzdik memlekettik qyzmetshisi baıqaýynyń jeńimpazy N. Bertileýova.
Nurgúl Berdibekova úsh balanyń anasy. Joldasy - jolserik. Erli-zaıypty halyqqa qyzmet kórsetý salasyn tańdap, osy salanyń úzdigi ataný úshin bar kúsh-jigerin salyp júr.
