Aqtóbelik qyz-kelinshekter ulttyq buıymdar jasaýdy úırendi
AQTÓBE. QazAqparat -Aqtóbelik sheber Gúlnur Asqarova qyz-kelinshekterge kıiz basyp, ulttyq buıym jasaýdyń jolyn úıretti, dep habarlaıdy QazAqparat tilshisi.
Óńirlik «Atameken» kásipkerler palatasy sheber Gúlnur Asqarovanyń tájirıbesin qala turǵyndaryna kórsetti. Sheber kıiz basý, túrli turmystyq buıym, kıim, áshekeı jasaýdy úıretti.
«Ózim kıiz basýdy anamnan úırendim. Keıin sheberligimdi shyńdap, túrli kórmelerge qatysyp, kıiz jasaý tehnologııasyn tolyq meńgerip aladym. Qazir suranys joǵary, bári ulttyq buıymdarǵa qyzyǵady. Kıizden jasalǵan tósenish, sómkeler, bas kıimder men áshekeılerge suranys joǵary. Qazaq halqy úshin kıiz buıymdarynyń orny erekshe. Ony turmystyń barlyq salasynda qoldanýǵa bolady. Halyq emshileri onyń emdik qasıeti baryn aıtady. Bilýimshe, kıizden uıaly telefonnyń sáýleleri ótpeıdi. Soǵan baılanysty kıizden qalta telefondaryna arnalǵan qaptar jasaımyn. Qazirgi kezde kıiz buıymdaryn kóbine sándik úshin paıdalanady», - deıdi sheber Gúlnar Asqarova.
Sheber qala turǵyndaryna kıiz basýdyń sýly tehnologııasyn úıretti. Oǵan qoıdyń júni, sý, sabyn bolsa jetkilikti. Qyz-kelinshekter bas-aıaǵy bir saǵattyń ishinde oıýly kartına jasaýdy úırendi. Olardyń kóbi qolónerdiń osy túrin meńgerý úshin aýdandardan ádeıi keldi.
«Ózim óner mektebinde sabaq beremin. Halqymyzdyń ejelden kıizden kıim men úı jabdyǵyn jasap, paıdalanǵan. Bizdiń mindetimiz - umyt bolyp bara jatqan qolóner týyndylaryn qaıta jańǵyrtyp, keıingi urpaqqa onyń jasalý joldaryn úıretý», - dedi Qarǵaly aýdanynyń turǵyny Aınagúl Mámbetova.
Sheber Gúlnur Asqarova aldaǵy ýaqytta kıizden jasalǵan týyndylaryna suranys artatynyna senedi.
