Aqtóbelik qyz-kelinshekter bıznes bastady
AQTÓBE. QazAqparat - Aqtóbeniń Temir aýdanyndaǵy qyz-kelinshekter bıznes jobalardy iske asyryp jatyr. Qyz jasaýyn daıyndap, eshki sútin satýdy qolǵa alǵandar kásibin jandandyrdy, dep habarlaıdy QazAqparat tilshisi.
Aqtóbe oblysynyń Temir aýdanyndaǵy qyz-kelinshekter «Bıznes bastaý» jobasy aıasynda nesıe alyp jatyr. Máselen, Gúlshara Shýtenova qyz jasaýyn daıyndaıdy. Al onyń kúıeýi Bolat Saǵyndyqov aǵashtan ydys-aıaq jasaıdy. Joba aıasynda bıznes bastaýdyń qyr-syryn úırengen Gúlshara Shýtenova qazir tapsyrystyń kóbeıgenine qýanyp otyr.
«Aýylda tapsyrys óte kóp. Úıimizdiń bir bólmesin jumys keńsesi etip jasaqtap, sharýamyzdy júrgizip otyrmyz. Bir túsingenim, kez kelgen jasta bıznesti bastaýǵa bolady eken. Men bul kásibimdi balalaryma mıras etip qaldyrǵym keledi»,- dedi kásipker.
Al Shubarqudyq aýylynyń turǵyny Gúlshara Aldasheva eshki sútin satady. Aýyl sharýashylyǵyn qarjylaı qoldaý qory arqyly nesıe alǵan kásipker Reseıden Zaanenkıı tuqymdy eshki satyp alǵan. Ár eshki kúnine 7 lıtr sút beredi.
«Zaanenskıı eshkisi kúnine 7 lıtr sút beredi. Úsh ret saýyp, sútin aýyl turǵyndaryna satyp otyrmyz. Eshki sútine suranys joǵary. Kóbi densaýlyqqa paıdaly, emdik qasıeti mol dep satyp alady. Balalaryna da beredi. Sonymen qatar, eshki sútinen jasalǵan qurt, irmishikke suranys bar. Aldaǵy jyldary sharýashylyqty keńeıtemiz»,- dedi Gúlnaz Aldasheva.
Aıta keteıik, «Bıznes bastaý» jobasy aıasynda Aqtóbeniń Temir aýdanynda 100-den astam adam bilim aldy. Olardyń 23-i bıznes jobasyn qarjylandyrdy.
