Aqtóbelik qurylysshylar jumys pen jalaqy tólemine kelise almaı jatyr
AQTÓBE. QazAqparat - Aqtóbe qalasynda qurylys jumystaryn júrgizgen bas márdiger men qosalqy merdigerler ózara kelise almaı jatyr. Biri jumysymnyń aqysy tólenbedi, ekinshisi jumystyń sapasy nashar dep syn aıtty, dep habarlaıdy QazAqparat tilshisi.
Memlekettik baǵdarlamamen salynǵan turǵyn úıdiń qurylys jumystaryna «Aktobeelektrosettroı» JShS jaýapty. Bas merdiger kompanııa ishki árleý jumystaryna qosalqy merdiger kompanııany shaqyryp, sońynda biri jumystyń sapasyna, ekinshisi jalaqyǵa qatysty syn aıtty. Búgin eki tarap kezdesip, taǵy da talap qoıdy.
«Berilgen jumys aýqymyn aıaqtamaǵan kezde ynta bolsyn dep aqyny aldyn ala tólep otyrdyq. Al jumysshylar óz ýaqytynda qurylysty sapaly atqarýǵa ýáde berdi. Ókinishke qaraı, jumysshylardyń keıbiri óz mindetin tııanaqty atqara almaı, biz basqa serikteske usynys berdik. Olar túngi ýaqytta da jumys istep, nysan sátti tapsyryldy. Al qazir páter alǵan adamdar jumysshylardyń is-áreketinen kinárat taýyp jatyr. Eýrojóndeý bolsa da qatelik bolady. Biraq sol qatelikti, eskertýdi joıý úshin qosalqy merdiger jumys isteý kerek. Al olar bul talapty oryndamaı otyr»,- dedi «Aktobeelektrosettroı» JShS-nyń ókili Qanat Kóshekenov.
«Aktobeelektrosettroı» JShS-y barlyq eskertýge qulaq asyp, árleýdi qaıta qalpyna keltirýge daıyn jumysshynyń búgin jalaqysyn berýge ýáde berdi.
«Adamdarǵa qaryzymyz ártúrli. Árqaısysyna 200-300 myń teńge qaryzbyz. Biz úsh kópqabatty turǵyn úı qurylysyn júrgizdik. Іshki árleý jumystary kezinde 40-50 brıgada jumys istedi. Biz olardyń 80 paıyzyna eńbekaqy tóledik. Ózgesi qatelik joıylǵan soń alady», - dedi Qanat Kóshekenov.
Búgin bas merdigerdiń ǵımaratyna jınalǵan aqtóbelikter eki aıdan beri jalaqy daýlap otyr. Olardyń árqaısysy nesıeni óteı almaı júr.
«Іshki árleý jumystary júrgizdik. Jumys aıaqtalyp, aqshamyzdy suraǵan kezde kúnde erteń dep, bizdi aldarqatyp júr. «Keıbir usaq-túıek jumystar durys atqarylmady, taǵy 20 paıyz aqsha ustalady» dep otyr. Bárin atqardyq. Jýyp, taza kúıinde tapsyrdyq, olar qabyldap aldy. Ózime 300 myń teńge qaryz boldy. Nesıemizdi tóleı almaı, paıyzy ósip jatyr», - dedi Baqytgúl Jubanyshbaıqyzy.
Aıta keteıik, merdiger kompanııa jumysshylarǵa 4 mıllıon teńgeden astam aqsha qaryz. Betpe-bet kezdesken eki tarap óz isiniń durys ekenin aıtyp, bitimge kelmeı tarady. 
