Aqtóbelik qolóner sheberleri jańa jylǵa arnap syılyqtar jármeńkesin ótkizdi
AQTÓBE. QazAqparat - Aqtóbegi óner mýzeıinde qolóner sheberleriniń kórme-jármeńkesi ótip jatyr. Sheberler jańa jylǵa arnalǵan kádesyı, syılyq daıyndaýdy 3-4 aı buryn bastaǵan, dep habarlaıdy QazAqparat tilshisi.
Mádenıet basqarmasy mýzeı qolóner sheberlerine arnap kórme-jármeńke uıymdastyrdy. Sheberler jyl boıy daıyndaǵan kádesyılary men syılyqtaryn, túrli áshekeılerdi, qýyrshaqtardy sata alady. Mundaı jármeńke Jańa jyl merekesi aldynda arnaıy ótkiziledi.
«Ár sheber óz qolóner buıymdaryn usyndy. Sheberler bir-birin tanıdy, jaqsy aralasady. Ózim kórme-jármeńkege 4 jyldan beri qatysyp júrmin. Ereksheligi, men ulttyq naqyshtaǵy syılyqtardy, kádesyılardy jármeńkege shyǵardym. Jyl saıyn jańa dúnıe ázirleımin. Bıyl shaǵyn baıpaq jasadym. Baıpaqtyń ishine aqsha, tátti salýǵa bolady. Bul baılyqtyń, molshylyqtyń belgisi dep yrymdaımyz. Daıyndyqty bir aı buryn bastap, satyp alýshylardy qýantýǵa asyqtym», - dedi sheber Gúlnur Asqarova. Ine men jip, kıiz, túrli matadan jasalǵan buıymdar oıýmen kómkerilgen. Keıbiri eksklıýzıvti, bir dana etip jasalady. Sheberler arnaıy daıyndalǵanymen satyp alýshylar óte az ekenin jasyrmady.
«Ár sheber janyn salyp, bar kúshin jumsap jaqsy kádesyı daıyndaıdy. Kóbi jumys isteıdi, tek bos ýaqytynda tigedi, toqıdy, buıymdar jasaıdy. Qosymsha tabys kózi ári ermek. Biz óz isimizden lázzat alyp, ózgelerge qýanysh syılaımyz. Mundaı jármeńke tek merekelerde uıymdastyrylady. Al Qolóner sheberleriniń úıi bolsa, kúndelikti mekenimizde eńbek eter edik. Sol kezde kez kelgen adam qaıda baratynyn, jergilikti sheberlerdiń qolynan shyqqan buıymdardyń qaı jerde satylatynyn biler edi. Ázirge bul usynys qoldaý tappady», - dedi sheber. Gúlnur Asqarova Jańa jyl merekesine arnap sharap qorabyn, uıaly telefonǵa arnalǵan qap, ústelge arnalǵan kórpe daıyndady. Sheber óz týystaryna, dostaryna arnap syılyq ázirlep qoıdy.
Al qaǵazdy shıyrshyqtap orap, toqyp, boıap qobdısha, qorap, ydys-aıaq jasaıtyn sheber Natalıa Gýnko jármeńkege tórt aı boıy daıyndaldy. Onyń turaqty satyp alýshylary qaǵazdan toqylǵan kádesyılardyń kollektsııasyn jasaıdy.
«Men shıyrshyqtalǵan qaǵazdan buıym jasaýdy ınternetten úırendim. Bul uzaq ýaqyt pen shydamdylyqty qajet etetin jumys. Qaǵazdy qııý, shıyrshyqtaý kerek. Keıin toqyp, syrtyn boıap qoıamyz. Ortasha qorapty toqýǵa 6 saǵatymdy jumsaımyn. Keıbirin 24 saǵat toqýǵa týra keledi. Gazetten de jasaımyz. Qaǵazdy baspahanadan alyp otyramyz», - dedi Natalıa Gýnko.
Sheber bıyl ıspan tehnologııasymen qobdısha toqydy. Sonymen qatar, keler jylǵa arnap ıttiń músini somdalǵan qobdısha daıyndady. Sheber ydys-aıaqqa adam densaýlyǵyna zııansyz boıaýlardy paıdalanady. Al qobdıshalardyń syrtyna lak jaǵylady.
Aıta keteıik, qolóner sheberleri ózderi arnaıy daıyndaǵan kádesyılardy arzan baǵaǵa satty. Mundaı jármeńke qaladaǵy saýda oryndarynda da ótip jatyr.
