Aqtóbelik kóligimen adamdardy tegin tasyp, muqtaj otbasylarǵa kómektesip júr
AQTÓBE. QazAqparat – Uzaq jyldar boıy munaı kompanııasynda eńbek etken Albına Bısenova qazir toı buıymdaryn jasap, kásip etip júr. Ári qaıyrymdylyq jumystaryn uıymdastyryp, adamdardy kóligimen tegin tasıdy, dep habarlaıdy QazAqparat tilshisi.
Albına Bısenova bıyl mamyr aıynda munaı kompanııasynan jumystan shyǵyp, jeke isin bastady. Qazir úılený toıy, syrǵa salý, tusaýkeser, shildehanaǵa qajetti zattardy daıyndap, satýǵa shyǵarady. Ári qaıyrymdylyq sharalaryn uıymdastyryp, muqtaj otbasylarǵa kómektesýden sharshaǵan emes.
«Áleýmettik jelide jeke paraqsham bar. Adam sany kóp emes. Biraq sol adamdar meniń qaıyrymdylyqpen aınalysyp, ıgi istiń uıytqysy bolýyma kómektesip júr. Muqtaj otbasy bolsa, aıtyp, bólisemin. Aqsha jınap bolǵan soń azyq-túlik satyp alamyn, aparyp beremin. Keıde stýdent qyzdardy janyma ertip alamyn. Negizi tanystarym muqtaj jandandy kórip, bilse, maǵan aıtyp, kómek berýin suraıdy. Keıde ózim shalǵaı jatqan saıajaılarǵa, jaqyn mańdaǵy baý-baqsha ujymdaryna baryp, kez kelgen adamnan muqtaj jandardy surap alamyn. Kóbine anasy nemese ákesi joq otbasyǵa baryp, tanysamyn. Bul ispen aınalysyp júrgenime 5-6 jyldyń júzi boldy. «Hareket» qorynyń da volonterimen. Baspana alyp berý bastamalarymen páterlerge qol jetkizgender bar»,- dedi aqtóbelik Albına Bısenova. Kıim-keshek, tipti azyq-túlikke muqtaj otbasylardyń kóbi páter jaldap turady. Keıbiriniń balasy múgedek.
«Men tek ózim izdemeımin, mektep dırektorlarynyń orynbasarlarymen de baılanysta otyrmyn. Al qarapaıym adamdar otyn, kıim-keshek pen jıhaz bolsa, habarlasyp, asa muqtaj jandarǵa berýdi qalaıdy. Keıde sadaqa beretinder sondaı adamdardy izdep, taýyp berýimdi ótinedi. Iıa, otbasynda eki adamnyń biri ǵana jumys isteıdi. Kóbine anasy bala kútimimen úıde otyrady. Taıaýda jeti balasy bar otbasyna kómek berdik. Árbir otbasymen jeke sóılesip, olardy tyńdaımyn. Eger múmkindik bolsa, jumys izdep, tabýǵa kúsh salamyn. Habarlandyrý kórsem, siltep jiberemin. Máselen, bir otbasynda anasy aýyrady, al 14 jastaǵy qyzy kondıterlik ónim daıyndaıtyn tsehta tájirıbege qatysty. Qazir ol jetkinshek tort pisiredi, tapsyrys qabyldaıdy. Taǵy bir mysal. Sot oryndaýshy habarlasyp, ákesi alıment tólemeı júrgenin, balasy onkologııalyq aýrýǵa shaldyqqanda anasy aqshadan tarshylyq kórip qınalǵanyn aıtty. Ota jasalǵan. Tósekke tańylǵan balaǵa arnaıy kereýet qajet bolyp habarlandyrý berdim. Quny 380 myń teńge bolatyn kereýetti satyp alýǵa halyq kómektesti. Bar bolǵany 18 saǵatta 452 myń teńge jınap aldyq», - dedi Albına Bısenova. Onyń aıtýynsha, bir kómektesken otbasyǵa qaıta barý qajet emes. Tek habarlasyp, olardyń óz betimen tirlik qylýyna kómektesken, baǵyt bergen áldeqaıda tıimdi. Jany meıirimdi, qaıyrymdylyq jasaýǵa qushtar kelinshek qazir túrli buıym jasaıdy. Salt-dástúrdi dáripteýge arnalǵan buıymdaryna suranys bar. Tipti elimizdiń ár aımaǵynan arnaıy ótinish-tilegin aıtatyndar kezdesedi.
«Kórpeshe, qobdısha sáýkele, úki alady. Qazir jańashyldyq engizip jatyrmyn. Dastarhandy bezendiretin zattar daıyndaımyn. Baǵasyn qymbat emes. Keıde jeńildik jasaımyn. Jalǵyzbasty ana balasyn úılendirse, arzanyna beremin. Bul kásippen shuǵyldanyp júrgenime jyldan asty. Qazaqstannyń ártúrli aımaǵynan tapsyrys túsedi. Bolashaqta kıim tikkim keledi. Maǵan anam Zakıra Turǵanqyzy jiger beredi. Ol adal bol dep aıtyp otyrady. Stýdent bolǵanda «bir jas úlken bolsa da avtobýsta oryn ber» dep aıtatyn. Sol aqyldy boıyma sińirip ótken janmyn», - deıdi ol.
Ol mektep bitirgen soń is júrgizýshi, esepshi mamandyǵyn meńgerdi. Sonymen qatar kólik júrgizgendi unatady. Rýlde otyrǵanyna 12 jyldan asty. Turaqty jumys istegende tańerteń, túste, keshke adamdardy tegin jetkizip tastady. Kúnine kem degende 15-20 adamdy dittegen jerine aparady. Tipti kóligine adam minbese ózin jaısyz sezinedi.
«Adamdar alǵysyn jaýdyrady. Maǵan keregi sol ǵana. Jaqsylyqqa ýaqyt tabýǵa bolady dep oılaımyn. Qazir is tigip tastaǵan soń baıaǵydaı adamdarǵa kómektesemin. Meni kútip turatyndar da bar. Biraq olardy men esimde saqtaı almaımyn. Bir kúni stýdent «apaı, men sizdi kúttim, sol kezde sabaqtan keshikken edim. Eki kún men sizben bardym. Ádeıi sol ýaqytty kúttim» dedi. Biraq men keıde josparymdy ózgertip, basqa baǵytqa júremin. Sol kezde de aıaldama janynan toqtap, baratyn jerimdi aıtyp, jol-jónekeı apara alatynymdy jetkizemin. Keıbirin 20-30 ret jetkizip tastaǵanmyn. Tasymaldap júrgenime 5-6 jyl bolǵan sııaqty», - dedi keıipkerimiz.
Albına Bısenovanyń isin úlgi tutqandar ózinen keńes alady. Oǵan taıaýda almatylyq habarlasyp, qaıyrymdylyq jumystaryn júıeli júrgizýdiń jolyn suraǵan.
«Keıbir adam kóligin tap-taza etip jýyp alady da eshkimdi mingizbeıdi. Tipti aıaq kıimińdi súrtip otyr dep aıtady. Adam kóp, kólik te kóp. Sol kólik ıeleri ózi baratyn baǵytta adamdardy alyp ketse, monopolıster baǵany kótermes edi. Men óz jumysymdy jaqsylyqtyń jelilik marketıngi dep aıtar edim. Jumystan sharshap kele jatsańyz, úıińizge tegin aparyp tastaıtyn adam kezikti. Kóńilińiz kóteriledi. Únemdelgen aqshaǵa qajetti zatty alasyz. Aqsha bereıin degen adamǵa tek zııansyz zat satyp alyńyz dep aıtamyn. Tipti meniń jaqsylyǵymdy jalǵastyryńyz deımin. Qarapaıym ári qaıyrymy mol jol osy», - dedi A.Bısenova.
