Aqtóbelik klıentiniń qymbat kóligin satyp jiberdi
AQTÓBE. QazAqparat - Aqtóbe qalasynyń turǵyny kóligin jóndeýge berip, ony tappaı qaldy. Jóndeý sheberi qymbat kólikke qyzyǵyp, ony satyp jibergeni úshin sot aldynda jaýap berip jatyr, dep habarlaıdy QazAqparat tilshisi.
Aqtóbe qalasynyń turǵyny Baýyrjan Dosmaǵambetov qyrkúıek aıynda quny 5,9 mıllıon teńge turatyn «Taıota Kamrı» kóliginiń maıysqan jerin qalpyna keltirip, boıap berýge kelisim bergen. Tehnıkalyq qyzmet kórsetý ortalyǵynda jumys isteıtin kólik jóndeýshi 2014 jyly shyqqan, jol-kólik apaty kezinde esigi sál maıysyp, boıaýy ketken kólikti qalpyna keltirýge 30 myń teńge surady. Klıent pen qyzmet kórsetýshi ózara kelisip, kóliktiń maıysqan esigi qalpyna keltirildi. Biraq boıaý taýsylyp, ózge ortalyqqa barýǵa sheshim qabyldady. Sol kezde sottalýshy Baýyrjan Dosmaǵambetov jábirlenýshige telefon shalyp, kólikti qalanyń basqa aýdanyndaǵy ortalyqqa aparýy tıis ekenin jetkizdi. Kólikti ózge ortalyqqa ózi aıdap aparǵan jóndeýshi sol kezde qymbat mashınaǵa qyzyǵyp, ony Aqtóbe-Atyraý baǵytyndaǵy tasjolmen aıdap ketken.
«Kóliktiń maıysqan bóligin jóndep, basqa ortalyqqa boıaýǵa kelistik. Sol kezde qosymsha aqy retinde klıentten 5 myń teńge surap aldym. Kólikke qyzyǵyp, ony Beıneýge aıdap kettim. Sol jerde Tolık esimdi balaǵa 750 myń teńgege sattym. Qujattaryn surady, keıin berýge kelistim. Eki arada kelisimshart jasalǵan joq. Atyraý qalasyna barǵan kezde meni polıtsııa ustap aldy. Beıneýge qaıta kelip, kólikti polıtsııaǵa tapsyrdym. Kólik ıesine qaıtaryldy»,- dedi sottalýshy Baýyrjan Dosmaǵambetov.
Ol kólik satyp, aqshanyń bárin óz qajettilikterine jumsaǵan. Bir balanyń ákesi qazir kólikti aıdap ketip, ony satyp jibergeni úshin Qylmystyq kodekstiń «Urlyq» baby boıynsha sot alynda jaýap berip jatyr. Onyń kinási tolyq dáleldense 5 jyldan 10 jylǵa deıin bas bostandyǵynan aıyrylýy múmkin. Ol buryn da sottalǵan. Keıin raqymshylyqqa ilikken.
«Kólik qaıtaryldy. Biraq qaıta jóndeýge 700 myń teńge jumsaldy. Jaza taǵaıyndaýdy sot qaraýyna qaldyramyn»,- dedi jábirlenýshi Qaramergenova.
Aıta keteıik, sottalýshy B.Dosmaǵambetov jábirlenýshiden keshirim surady. Sot otyrysy kezinde sottalýshynyń baýyry aýyratyny belgili boldy. Sot qysqartylǵan tártipte ótip jatyr.
