Aqtóbelik kelinshek betin tilgilep tastaǵan burynǵy kúıeýin sotta keshirdi
AQTÓBE. QazAqparat – Búgin Aqtóbe qalalyq sotynda burynǵy áıeliniń betin pyshaqpen aıaýsyz tilip tastaǵan er adamǵa qatysty is boıynsha jaryssózder ótti. Prokýror aıyptalýshyny 6 jylǵa bas bostandyǵynan aıyrýdy surady, dep habarlaıdy QazAqparat tilshisi.
Qalalyq sotynda Qylmystyq kodekstiń «Densaýlyqqa qasaqana aýyr zııan keltirý» baby boıynsha is qaraldy.
Jaryssóz kezinde tilshilerdiń onlaın baılanysqa shyǵýyna múmkindik jasaldy.
Sot otyrysy kezinde prokýror aıyptalýshy Bekenovti 6 jyl bas bostandyǵynan aıyryp, jazasyn óteýdi qaýipsizdigi ortasha túzetý mekemesinde belgileýdi surady.
Onyń atap ótýinshe, áıeldiń betinde jaraqattan keıin qalǵan tyrtyqtar ózdigimen ketpeıdi. Sondyqtan, plastıkalyq operatsııa jasatý qajet. Qylmystyq is aýyr qylmystar sanatyna jatqyzylǵan.
Al jábirlenýshi Aınagúl Bekenova burynǵy kúıeýin keshiretinin aıtty. «Men oǵan keshirim beremin. Biraq, bostandyqqa shyqqan soń, meni mazalamaýy tıis», - dedi jaryssózde ol.
Bekenov bolsa, kinásyn moıyndap, kámeletke tolmaǵan balalary úshin bostandyǵynan aıyrmaýdy surady jáne qoıylǵan barlyq talapty oryndaýǵa ýáde etti.
Aıta keteıik, oqıǵa bıyl naýryz aıynda boldy. Erli-zaıypty ajyrasqan soń burynǵy kúıeýi áıeliniń jumys ornyna baryp, ony uryp-soqqqan, betin birneshe ret ótkir zatpen tilgen.
Keıin is tergeýge alynyp, qylmystyq is qozǵaldy. Sottalýshy óz kinásin moıyndady.
Sot úkimi erteń shyǵarylady.
