Aqtóbelik kelinshek balalaryn qoqys jáshiginen tapqan aspen tamaqtandyryp júr
AQTÓBE. QazAqparat - Aqtóbedegi saıajaılardyń birinde turatyn Olesıa Letavskaıa balalaryn qoqys jáshiginen tapqan aspen tamaqtandyryp júr. 1 jastaǵy Kırıll men 3 jastaǵy Vıkanyń oıynshyqtary da qoqystan alynǵan, dep habarlaıdy QazAqparat tilshisi.
Aqtóbede áleýmettik jaǵdaıy tómen otbasy amaly taýsylǵan soń qoqys jáshiginen tapqandy kıip, tamaqtanyp júr. Olar kóshede kele jatqanda qolyna túsken temir-tersekti jınap, tapsyrady, aqshasyn páteraqyǵa beredi. Saıajaıdaǵy kishkentaı úı úshin olar aı saıyn 15 myń teńge tóleıdi. Jaryqqa qosymsha aqy taǵy bar.
«Ózim Batys Qazaqstan oblysynan keldim. Jasym 27-de. Sol jerdegi balalar úıinde ósip, keıin meni anam alyp ketti. Ekeýimizdiń minezimiz saı kelmeı, men 18 jasymnan bastap jalǵyz ómir súrýdi úırendim. Ár jerde jaldamaly jumys istedim, eden jýdym. Biraq turaqty eńbekke aralasa almadym. Sebebi balalarymdy qaraıtyn, baǵatyn adam joq. Úlken qyzym 3 jasta, kishkentaıym 1 jasta. Bir kúni úıde tamaq bolmaı, balalarym jylady. Olardyń janyn saqtap qalý úshin záýlim úılerdiń janyndaǵy qoqysty aralaýyma týra keldi. Aýqatty adamdar kez kelgen tamaqty laqtyryp tastaıdy. Men sol jerden jeýge jaramdy tamaqtardy aldym. Úıdegi oıynshyqtar, tósenishter, perde bári qoqys jáshikterinen alyndy»,- dedi Olesıa Letavskaıa.
Olesıa Letavskaıa azamattyq nekedegi kúıeýimen birge turady. Qazir úshinshi balasyna júkti. Balalardyń týý týraly kýáliginde ákeleri týraly esh málimet joq. Aqtóbe qalalyq jumyspen qamtý jáne áleýmettik baǵdarlamalar bólimi bul otbasyny baqylaýǵa alǵan. Balalarǵa aı saıyn járdemaqy beriledi.
«Olesıa Letavskaıa qujattaryn tapsyryp, kómek surady. Bul otbasynyń qalalyq komıssııa qarap, sheshim qabyldaıdy. Eger kómektesý týraly sheshim shyqsa, bul otbasyna 60 myń teńge kóleminde birjolǵy kómek beriledi. Sonymen qatar, eki balaǵa 3 019 teńge járdemaqy qarastyrylmaq»,- dedi Aqtóbe qalalyq jumyspen qamtý jáne áleýmettik baǵdarlamalar bólimi basshysynyń orynbasary Meıirjan Qaraqov.
Ázirge otbasynyń jaǵdaıyn estigen aqtóbelikter qolda bar azyq-túlik pen kıim-keshekti jetkizip jatyr.
