Aqtóbelik kásipkerler jetim balalardyń esepshotyna qarjy saldy
AQTÓBE. QazAqparat - Aqtóbelik kásipkerler men turǵyndar jetim balalardyń esepshotyna qarjy bólip jatyr. Keıbiri ata-ananyń qamqorlyǵynsyz qalǵan balalardy óz baqylaýyna aldy, dep habarlaıdy QazAqparat tilshisi.
Aqtóbe qalasynda 372 bala páter kezeginde tur. Olardyń 258-de demeýshi bar. ıAǵnı, demeýshiler aı saıyn jetim balalardyń esepshotyna qarjy salyp, onyń páter alýyna kómektesýi kerek. Búgin kásipkerler men qarapaıym qala turǵyndary, meshit ujymy jetim balalardyń esepshotyn toltyrdy.
«Baqytty bala» jobasy aıasynda ótip jatqan qaıyrymdylyq aktsııasyna Aqtóbedegi meshit jamaǵaty da qatysty. Biz Ramazanǵa 100 myń teńgeniń sertıfıkatyn tabys ettik. Aldaǵy ýaqytta onyń esepshotyna aı saıyn 20 myń teńge salamyz» ,- dedi «Nur Ǵasyr» meshitiniń bas ımamany Tólebı Ospan.
Búgin barlyǵy 19 balaǵa arnaıy sertıfıkat berildi. Kómek kórsetken top arasynda qurylys kompanııasy, saýda oryndary men shaǵyn jáne orta bıznes ıeleri bar. Máselen, «Teri saraı» saýda úıiniń dırektory Almagúl Bekenova quny 5 mıllıon teńge bolatyn 100 syrt kıimdi syılady.
Aıta keteıik, qaıyrymdylyq aktsııasy aıasynda qala ákimi Іlııas Ispanovtyń ótinishimen «QTJ» AQ Aqtóbe oblystyq fılıaly jáne Aqtóbe qurylys jáne bıznes kolledji eki jetim balany jumysqa qabyldady. Bul shara jyl boıy jalǵasady.
