Aqtóbelik kásipkerler jazasyn óteýshilermen birge yntymaqtasa eńbek etetin boldy
AQTÓBE. QazAqparat - Aqtóbelik kásipkerler, joǵary oqý oryndary, bilim, medıtsına salasy jazasyn óteýshilerge tapsyrys beredi. Búgin ondaǵan memorandýmǵa qol qoıyldy, dep habarlaıdy QazAqparat tilshisi.
Aqtóbe qalasynda «Serpin» kórmesi ótkizildi. Túrmede otyrǵandardy jumysqa alǵan 16 kásipker aǵash, temir, temir-betonnan jasalǵan buıymdar men kıimderdi satýǵa shyǵardy.
«Adasqannyń aıyby joq, qaıta úıirine qosylsa» degen sóz bar. Ómirde durys qadam jasamaı, zańdy buzyp, qylmysqa tartylyp, jazasyn ótep otyrǵan azamattarǵa kómek berý kerek. Memleket basshysy Nursultan Nazarbaev Ult josparynda jazasyn óteýshilerge júıeli túrde ońaltý jumystaryn júrgizýdi tapsyrǵan bolatyn. Maqsatymyz -mamandyq berý, áleýmettik qoldaý, jumysqa ornalastyrý. Aqtóbe men Jem qalasynda arnaıy eki kolledj ashylyp, onda qurylysshy, gazelektr dánekerleýshi, temir ustasy daıyndalyp jatyr. Kvotamen jumysqa ornalastyryp jatyr. Jylyna 300 kvota berilýde»,- dedi oblys ákimi Berdibek Saparbaev.
Aqtóbe qalasynda alǵash ret uıymdastyrylǵan kórme-jármeńke kezinde keńse jıhazdary da boldy. Sonymen qatar, almatylyq kásipkerler jumysshylaryna aıyna 20-30 myń teńge bólip, arnaıy kıim tiktiredi.
«Senimgerlik basqarýmen jumys istep jatyrmyz. Biz túrme ishindegi tsehty tegin alyp, 25 adamǵa jumys berip otyrmyz. Alǵashynda jazasyn óteýshilerge mata, kıim tigýdiń úlgisin kórsetetin beınematerıal jiberildi. Olar ózderi meńgerip, jumys istep otyr. Er adamdardyń qolynan shyqqan kıimderdiń sapasy óte joǵary. Olar tiginshi áıelderden asyp tústi»,- dedi kásipker I.Prokopenko.
Bilim, densaýlyq saqtaý, jeke kásipkerlik salasynyń ókilderi bolyp, 60 memorandýmǵa qol qoıdy. Aqtóbe oblystyq qylmystyq atqarý júıesi departamenti áli jumyssyz otyrǵan 400-den astam jazasyn óteýshi men probatsııalyq baqylaýdaǵy jumyssyzdardy eńbekke aralastyrýdy josparlap otyr.
