Aqtóbelik kásipkerler memlekettik-jekeshelik áriptestik aıasynda balabaqsha salmaq
AQTÓBE. QazAqparat - Aqtóbelik kásipkerler memlekettik-jekeshelik áriptestik aıasynda balabaqsha salýǵa ótinish bildirip jatyr. Buryn jeke balabaqsha ashqan kásipkerler de bıznes jospar jasaýǵa kiristi, dep habarlaıdy QazAqparat tilshisi.
Aqtóbede memlekettik-jekeshelik seriktestik aıasynda 151 jobany ázirleý jáne iske asyrý jumysy júrip jatyr. Basym bóligi bilim, densaýlyq saqtaý salasyna tıesili. Jobalardyń qalpy quny - 42,6 mıllıard teńge. Bilim salasynda balashaqsha salýǵa nıet bildirgender basym. Máselen, «QazHrom» TUK» AQ Hromtaý qalasynan 320 oryndy balabaqsha salady. Sonymen qatar, jeke kásipkerlerdiń usynysymen Temir aýdanynda 75, Qarǵaly aýdanynda 50 oryndy balabaqsha salý josparlanǵan. Ári bir balabaqshanyń baǵyty ózgerip, bıyl bul oryn múmkindigi shekteýli balalarǵa beriledi.
«Qazirgi kezde jeke balabaqsha kóp. Olardyń keıbiri memlekettik tapsyrys qabyldap otyr. Eger bıýdjette qarjy qarastyrylmasa, jeke balabaqshalar tapsyrys almaýy múmkin. Al memlekettik-jekeshelik seriktestik aıasynda ekijaqty kelisimge qol qoıylsa, memleket kelisimde kórsetilgen jyldar aralyǵynda qarjy aýdarýǵa mindetti. Osy artyqshylyqty túsingen kásipkerler jeke balabaqshalaryna bıznes jospar daıyndap, qujattaryn rettep jatyr. Ótken jyly jańa talaptar engizilip, komıssııa sheshiminen soń ótinishti máslıhat maquldaıtyn boldy. Bir jobany iske qosý úshin 4-6 aı qajet bolady. Al kelisim 5-30 jylǵa jasalady»,- dedi Aqtóbe oblystyq bilim basqarmasynyń bólim basshysy Almagúl Tolybaeva.
Qazirgi kezde Aqtóbe qalasynda jeke balabaqsha ıeleri memlekettik-jekeshelik seriktestiktiń artyqshylyqtaryn túsindi. Olardyń 40-tan astamy bıznes jospar daıyndap, ákimdikpen kelisimshart jasaýǵa qujattary daıyndalyp jatyr.
Aıta keteıik, Aqtóbede sport, densaýlyq saqtaý, mádenıet salasynda da memlekettik-jekeshelik seriktestik jobalary qarastyrylyp jatyr. Aýyldardaǵy shaǵyn emhanalar da kásipkerlerdiń qoldaýymen salynady. Sonymen qatar, Chehııa eliniń ınvestorlary Muz saraıynyń qurylysyn bastady.
