Aqtóbelik kásipkerler karantın shekteýin jeńildetýdi surady
«Atameken» óńirlik kásipkerler palatasynda oblystyq sanıtarııalyq-epıdemıologııalyq baqylaý departamenti men oblystyq densaýlyq saqtaý basqarmasynyń basshylary kásipkerler suraǵyna jaýap berdi. Óńirlik kásipkerler palatasynyń dırektory Sulýpan Shyntasova bıznes ıeleriniń ótinishin jetkizdi.
«Kásipkerlerdiń usynysy bar. Jeksenbi kúni shashtaraz, sulýlyq salony men kosmetıkalyq ortalyqtardyń saǵat 17:00-ge deıin jumys istegenin qalaıdy. Sonymen birge bazar, saýda ortalyqtary men oıyn-saýyq keshenderi, qoǵamdyq tamaqtaný oryndary men monsha jumysyna ruqsat berýdi suraıdy. Tek jumys kestesine shekteý engizse bolǵany», - dedi Sulýpan Shyntasova.
Kásipkerlerdiń bul usynysyn tyńdaǵan oblystyq sanıtarııalyq-epıdemıologııalyq baqylaý departamentiniń basshysy Nursulý Berkimbaeva adam kóp jınalatyn ortalyqtardyń demalys kúnderi jabyq bolǵany durys degen talaptyń el boıynsha ortaq ereje ekenin eske saldy.
«Senbi, jeksenbi kúnderi bazarlar, ortalyqtar jabyq bolsa, aýdan turǵyndary ortalyqqa aǵylyp kelmeıdi. ıAǵnı, qozǵalys bolmaıdy. Al bári ashyq tursa, olar bazar aralap, aýylǵa vırýs juqtyryp barady», - dedi oblystyq densaýlyq saqtaý basqarmasynyń basshysy Rústem Isaev.
Aıta keteıik, naýryz aıyna qaraǵanda sáýir aıynda vırýs juqtyrǵandar sany óńirde eki ese artty. Qazirgi kezde 2 myńnan astam adam dáriger kómegine júgingen.
