Aqtóbelik kásipkerler azyq-túlik baǵasyn arzandatýǵa kelisti
AQTÓBE. QazAqparat - Aqtóbede jergilikti taýar óndirýshiler azyq-túlik baǵasyn arzandatýǵa kelisti. Bastamany aldymen sút óndirýshiler qoldady, dep habarlaıdy QazAqparat tilshisi.
Qazan aıyn qorytyndylaǵan Aqtóbe oblystyq statıstıka departamenti azyq-túliktiń qymbattaǵanyn jasyrmady. Departamenttiń jetekshi mamany Aızat Táńirbergenovanyń aıtýynsha, bir aı ishinde sıyr eti 1,3 paıyzǵa, kartop 24,5 paıyzǵa kóterildi. Kókónis pen jumyrtqa quny da 10 paıyzǵa artty. Sút ónimderi qymbattady. Bul baǵyttaǵy jumysty jandandyrý maqsatynda jergilikti taýar óndirýshiler óz usynystaryn bildirdi.
«Aqtóbede fın-pak qorabyndaǵy maılylyǵy 2,5% bolatyn sút jáne aıranǵa suranys joǵary. Sondyqtan sút fermasy súttiń lıtrin 222 teńgeden 210 teńgege deıin jáne maılylyǵy 2,5% aırannyń lıtrin 240 teńgeden 230 teńgege deıin arzandatty. Sút jergilikti iri saýda oryndarynda satylyp jatyr», - dedi «Aıs» JShS ókili Aıbek Batysjanov.
Aqtóbe oblystyq kásipkerlik basqarmasy erteń «Tabys» kommýnaldyq bazarynda sábizdiń kelisi 75, pııaz 60 teńgege satylatynyn málimdedi. Sonymen qatar, kommýnaldyq bazarlarda aımaqaralyq kooperatsııa negizinde 60-70 teńgeden kartop satylyp jatyr.
«Aqtóbe qalalyq ákimdigi men iri saýda jelileri arasynda memorandýmǵa qol qoıylǵan. Demek saýda jelileri jergilikti taýar óndirýshilerdiń ónimine 10 paıyzdan artyq ústemeaqy qosa almaıdy ári olar ózara deldalsyz jumys isteıdi. Qysta súttiń azaıatyny belgili. Sondyqtan sút baǵasyn tómendetip otyrmyz. Іri saýda jelileri nan qunyna tek 1 teńge qosady. Bul aktsııa jyl sońyna deıin saqtalady, keıin jalǵasady», - Aqtóbe oblystyq kásipkerlik basqarmasy, saýda bóliminiń jetekshisi Maıa Bımenova.
