Aqtóbelik kásipker jylqy músinin kollektsııalap júr

Aqtóbelik kásipker Erbol Baıjarqynov shetelge jıi shyǵady. Ol ár saparynda ózine jylqy músinin satyp alýdy ádetke aınaldyrǵan.
 

«Shetelge barǵan kezde estelik retinde attyń músinin alamyn. Músinder shynydan, aǵashtan, pil súıeginen, mármár tastan, tipti altynnan jasalǵan. Arnaıy jınalǵan músinderdiń úlkeni 20-30 santımetr bolsa, kishkentaıy 1 santımetrge jetedi. Bári qundy, qymbat. Ózim sekildi attyń músinin kollektsııalaǵan adamdy kezdestirmedim. Meniń kollektsııamdy biletin jaqyndarym da attyń músinin syılap, qýantady. Attyń músinin jınaǵanyma 20 jylǵa jýyq ýaqyt ótti»,- dedi E.Baıjarqynov. Sonymen qatar, estelik monetalary da bar. Kásipker týǵan jerin bárinen bıik qoıady. Álemdi aralady, elimizdiń úzdik qalalarynda boldy. Kórgeni, túıgeni ony Aqtóbede ustap otyr.
 

«Kásipkerlik jumysty bastaǵan kezde Túrkııaǵa bardym. Sol kezde qandastarymyzdy keziktirdim. Ol ata-babasynyń júrgen joldary men ómirin, týǵan jerdi saǵynǵanyn aıtty. «Bir ýys jýsan ala kelshi, ıiskeıin» dep kózine jas alǵan sáti qatty áser etti. Reseıdiń úzdik dárigeri bir kezderi týǵan jeri Ózbekstanǵa ýaqtyly oralmaǵanyna ókindi. Mundaı mysaldar óte kóp. Ózge elde sultan bolǵansha, óz elińde ultan bol! Mine, osy sózdiń qudireti meni aýylǵa jeteledi, týǵan jerge ákeldi»,- dedi ol.

Qazir kásipker bala tárbıesine úlken mán beredi. Balalaryn úlken ómirge úıretý úshin Máskeýge oqýǵa jiberip, keıin olardy qaıtadan elge ákeledi. Bilim, ilimdi meńgergen balalaryna eńbektenýdi, jumys isteýdi úıretedi.
 

«Aqsha - qaǵaz. Búgin bar, erteń joq. Aqsha jınap, saqtaýdy emes, jumys istep, artymdy iz qaldyrýdy oılaımyn. Eldegi erdiń qolynan is keletinin bári kórýi kerek. Eń úlken baılyq - jaqsy tárbıe. Balalaryn durys tárbıeleı alǵan adam ǵana baı. Er adam bir aýyz sózben balasynan esep ala alady. «Balam, búgin ne istediń?» Osy suraqqa jaýap ala bilý kerek. Sol kezde bala «keshke ákem keledi, qandaı jaýap beremin» dep oılanyp, áreket etýi tıis. Іshtim, jedim, oınadym. Bul jaýap emes. Paıdaly isti aıtýy kerek. Bizdiń esebimiz mal jaılap, sý tasýdan bastaldy. Bul jaýap. Sonymen qatar, bala jeti atasyn bilýi shart», - dedi kásipker.