Aqtóbelik kásipker táýligine 2 keli salmaq qosatyn iri qara ósirýdiń jolyn aıtty
AQTÓBE. QazAqparat - Aqtóbede «Aktobe Invest-2017» halyqaralyq forýmy ótip jatyr. Aýyl sharýashylyǵy qurylymdarynyń damýyna baǵyttalǵan jıynda aqtóbelik kásipker mal bordaqylaý, et eksporttaý jolyn aıtyp berdi, dep habarlaıdy QazAqparat tilshisi.
Aqtóbede ótip jatqan «Aktobe Invest-2017» halyqaralyq forýmy aıasynda «Jahandaný kezeńindegi agroónerkásip kesheni jáne tamaq ónerkásibi» otyrysy ótti. Jıynǵa Aýyl sharýashylyǵy mınıstrligi, «NUH» QazAgro» AQ, «QazAgroQarjy» AQ, «QazAgroÓnim» AQ, aımaqtyń agroóndiristik kesheni, jergilikti qarjylyq ınstıtýt ókilderi, sheteldik iri kompanııalardyń quryltaıshylary qatysty.
Qazirgi kezde Aqtóbe oblysynda et, sút jáne astyq klasterleri jaqsy damyp keledi. Sonymen qatar, jylyjaı, jemis-jıdek daqyldary, balyq ósirý jáne dástúrli emes sharýashylyqtyń jumysynda da ósim bar. Máselen, sońǵy úsh jylda iri qara maly 18,7 myń basqa, qoı 49,6 myńǵa, jylqy 13,6 myń basqa kóbeıdi. Egin alqabynyń kólemi artyp, sońǵy úsh jylda 656 myń gektarǵa jetti. Óńirde et eksporty jolǵa qoıyldy. Forýmǵa qatysqan «AkTep» JShS quryltaıshysy Nurlan Saǵynalınniń aıtýynsha, et kombınaty kesheni qaldyqsyz jumys isteıdi. Munda 9 myń bas bordaqylaý alańynda tur. Aýyl sharýalary, qarapaıym turǵyndar kúnine 350-450 taıynsha ákelip, bordaqylaýǵa tapsyrady. Sharýashylyqta angýs tuqymdy iri qara táýligine 2 keli, al aýyl adamdarynyń maly táýligine 1 keli salmaq qosady.
Aıta keteıik, «AkTep» JShS et kombınaty 2015 jyly iske qosyldy. Kompanııa etti iri qara ósirýdiń baǵdarlamasyn ázirledi. Aýyl, aýdandaǵy sharýalardyń malyn baǵyp, semirtip berdi. Al sharýa iri qaranyń salmaǵyna aqy tóleıdi.
«Qazirgi kezde 3 myń bas iri qarany jalǵa alyp otyrmyz. ıAǵnı, iri qarany baǵamyz, jemdep, semirtemiz. Maldy keıin sharýaǵa qaıtaryp beremiz. Jańa baǵdarlama boıynsha jumys bastaldy. Sharýashylyqqa kem degende 30 bas iri qara bolýy kerek. Mamandar baryp, ár iri qarany ólshep alady. Bul jumystar kórshiles oblystarda da júredi»,- dedi «AkTep» JShS quryltaıshysy Nurlan Saǵynalın. Munda jylyna 7200 tonna et óńdeıtin keshen bar. Et Reseıge eksporttalyp jatyr. Joba memlekettik baǵdarlama arqyly iske qosylyp, «QazAgroQarjy» AQ arqyly qarjylandyryldy. 
