Aqtóbelik kásipker múgedek qyzy bar otbasyna páter syılady
AQTÓBE. QazAqparat - Aqtóbe oblysy, Shalqar aýdanynyń turǵyny Baǵıla Bekisheva tary-talqan satyp, otbasyn asyrap otyr. Aýyl turǵynynyń múshkil hálin kórgen aqtóbelik kásipker Sáýle Dáýletalına otbasyǵa 2 bólmeli páterdi syıǵa tartty, dep habarlaıdy QazAqparat tilshisi.
Aqtóbe oblysy, Shalqar aýdanynda turatyn Baǵıla Bekisheva bir otbasyny ózi asyrap otyr. Kúıeýi Aldabergen Bekish jasy 60-tan asqan soń turaqty jumys taba almaı júr. Ári boıdan kúsh ketkende aýyr jumys isteı almaıdy.
6 qyz, 1 ul tárbıelep, «Altyn alqa» alǵan ana týa bitti sal aýrýyna shaldyqqan qyzy Gúlshat Bekishevany da baǵyp otyr. Kúıbeń tirlikke salynyp, tary qýyryp, ony dıirmenge tartyp, talqan satyp, tamaǵyn taýyp júrgende múgedek qyzyn da emdete almady. Al jalǵyz uly júrek aýrýyna shaldyǵyp, ota jasatty. ІІ top múgedegi aýyr jumysqa jaramsyz. Bul otbasynyń jaǵdaıyn bilgen kásipker áıel Sáýle Dáýletalına Ramazan aıynda 2 bólmeli páterdi syılady.
«Ózim Shalqar aýdanynyń qyzymyn. «Nur Otan» partııasynyń aýdandyq fılıaly mán-jaıdy aıtqan soń áleýmettik jaǵdaıy tómen, múgedek balalary bar anamen, otbasymen kezdestim. Gazy joq úıde turady. Eshkim turaqty jumys istemeıdi. Múgedek balalarynyń zeınetaqysy men anasy Baǵıla Bekishevanyń tary-talqan satyp, tapqan tabysymen kúnkóredi. Olardy kórip, júregim aýyrdy. Jaǵdaıyn sózben aıtyp jetkizý múmkin emes. Ramazan aıynda qaıyrymdy is jasaýǵa bekinip, múgedek qyzy úshin 2 bólmeli páter alyp berdim. Aldaǵy ýaqytta azyq-túlik jetkizip, 18 jasqa kelgen Gúlshat Bekishevaǵa saýyqtyrý sharalaryn uıymdastyramyn»,- dedi kásipker.
Kásipker memlekettik-jekeshelik seriktestik aıasynda aýdanǵa saýyqtyrý keshenin salyp, 18 jastaǵy Gúlshatty tegin emdemek.
