Aqtóbelik qarııa jańa jyl merekesimen quttyqtaǵan Berdibek Saparbaevqa jyr arnady
AQTÓBE. QazAqparat - Aqtóbe oblysynyń ákimi Berdibek Saparbaev qarttar men múgedekterdi jańa jyl merekesimen quttyqtady. Qarttar úıiniń turǵyny Vera Polýektova oblys ákimine jyr arnady, dep habarlaıdy QazAqparat tilshisi.
Aqtóbe oblysyndaǵy qarttar men múgedekter úıinde 232 adam turady. Onyń 95-i múgedek. Qazirgi kezde munda medıtsınalyq qyzmet kórsetiledi, qarııalar men múmkindigi shekteýli azamattar bos ýaqytynda qolóner buıymdaryn jasaıdy. Ájeler kórpe tigip, quraq quraıdy. Er adamdarǵa sheberhana bólingen. Buǵan deıin eski kólikpen emdeý oryndaryna baryp júrgen turǵyndarǵa endi arnaıy ınvataksı satyp alynady. Turǵyndardy quttyqtaýǵa barǵan oblys ákimi Berdibek Saparbaev el úshin eńbek etken qarııalarǵa alǵysyn bildirdi.
«Ómir boıy memleketimizdiń damýy, halyq turmysynyń jaqsy bolýy úshin eńbek ettińizder. Kúshterińiz ben múmkindikterińizdi, jas jigerlerińizdi elge berdińizder. Biz umytpaımyz, bilemiz, aldaryńyzda basymyzdy ıemiz. Qıyn kezde jumys istep, eldiń damýyna úles qostyńyzdar. Biz óz kezegimizde óz úılerińizde turǵandaı jaǵdaı jasaımyz»,- dedi Aqtóbe oblysynyń ákimi Berdibek Saparbaev.
Búgin jańa jyldyq merekege oraı múgedekter men qarttar óleń aıtyp, zamandastaryna syı jasady.
Ulan Abdýǵazın óleń aıtyp, Vera Polýektova oblys ákimi Berdibek Saparbaevqa jyr arnady. Ol ınternat úıiniń janyna aıaldama suraǵandaryn, bul suranystyń oryndalǵanyn jetkizdi.
Aıta keteıik, Aqtóbe oblysynyń ákimi jyl saıyn qarttar men múgedekter úıiniń turǵyndarymen kezdesip, tilekterin tyńdaıdy. Ótken jyly olar káriz júıesin jańartyp, aıaldamaǵa qoǵamdyq kólikterdiń kelýin suraǵan bolatyn. 
