Aqtóbelik qarııa óziniń tiri ekenin dáleldeı almaı júr
AQTÓBE. QazAqparat - Aqtóbe oblysy, Alǵa aýdanynyń turǵyny Darıǵa Salmaǵambetova qańǵybastar úıinde turyp jatyr. Ol qujat boıynsha qaıtys bolǵan adamdardyń tizimine enip ketken, dep habarlaıdy QazAqparat tilshisi.
Aqtóbeniń Alǵa aýdanynan oblys ortalyǵyna kelgen Darıǵa Salmaǵambetova qazir belgili turaǵy joq jáne qylmystyq jazasyn ótegen tulǵalardy beıimdeý ortalyǵynda turyp jatyr. Ol týǵan ulynyń úıinen ketip qalyp, keıin beıtanys adamnyń shańyraǵyna barǵan. Ózine jat adamnyń qas-qabaǵyna qaraǵan qarııa beıimdeý ortalyǵyn eń qolaıly jer dep otyr.
«Ulymmen birge turdym. Keıin balam belgisiz jaqqa ketip qalyp, kelinimniń janynda boldym. Balamnyń qaıda júrgenin, bar nemese joq ekenin bilmeımin. Al kelinim maǵan úıden shyq dep aıtyp, maza bermedi. Men jaǵdaıymdy aıtyp, aýyl ákiminen kómek suradym. Olar aýyldan bir adamdy taýyp berdi. Sol úıde turyp, zeınetaqymdy berdim. Biraq olar tamaq bermeı, ash qaldym. Urdy, qorqytty. Sodan deıin ketip qaldym»,- dedi Darıǵa Salmaǵambetova.
Qarııa 79 jasta. Ol tamyz aıynan beri qańǵybastarǵa arnalǵan ortalyqta turyp jatyr. Ár jerge kóship, jan baǵyp júrgen kezde Darıǵa Salmaǵambetova tiri adamdar qatarynan joıylyp, óliler qataryna qosylǵan. Qujatty qaıta jasatyp, óziniń tiri ekenin dáleldeý qıynǵa soǵyp tur.
«Jeke kýáligi bar, zeınetaqy alyp otyrǵan qarııa bir kúnde óli adamdardyń tizimine alyndy. Beıimdeý ortalyǵyna kelgen soń Halyqqa qyzmet kórsetý ortalyǵyna baryp, tirkeýge alýdy jón kórgen edik. Sol kezde onyń qaıtys bolǵan adamdar tizimine enip ketkenin bildik. Qazir qujattary qaıta jasalyp jatyr»,- dedi beıimdeý ortalyǵynyń mamany Raısa Darmysheva.
Aıta keteıik, Halyqqa qyzmet kórsetý ortalyǵynda qujattar qaıta qalpyna keltirilip jatyr. Mamandardyń aıtýynsha, 2011 jyly málimetter bazasy qaıta jasalyp, aýyldyq okrýgtiń anyqtamasy boıynsha Darıǵa Salmaǵambetova qaıtys bolǵandar tizimine enip ketken.
Sebebi, qarııanyń jeke kýáliginde JSN bolmaǵan. Al ol kýálikter qazir jaramsyz. Qatelik aýyldyq ákimdikten ketti. Olar qarııa týraly adamdardan surap, tappaǵan soń qaıtys bolǵany týraly anyqtama berip jibergen. Keıin anyqtalmalyq aýdandyq ishki ister bólimine berildi. Darıǵa Salmaǵambetova óziniń tili ekenin dáleldeý úshin aldymen qaıtys bolǵany týraly akti alady. Keıin nelikten mekenjaıy boıynsha turmaıtyny týraly túsinikteme jazady. Jeke kýáliktiń kóshirmese de qajet. Al HQKO eki kúnde qujatyn qaıta jasap, málimetter bazasyn jańartady.
