Aqtóbelik qarııa óziniń koronavırýs ınfektsııasyn qaıdan juqtyrǵanyn bilmeıdi
AQTÓBE. QazAqparat – Aqtóbede 55 jastaǵy er adamnan koronavırýs ınfektsııasy anyqtaldy. Qazir onymen baılanysta bolǵan barlyq adam oqshaýlandy, dep habarlaıdy QazAqparat tilshisi.
Aqtóbe oblysynda COVID-19 ınfektsııasyn juqtyrǵandar sany barlyǵy – 14. Búgin 1965 jyly týǵan er adamnyń koronavırýs ınfektsııasyn juqtyrǵany tirkeldi. Ol oblystyq juqpaly aýrýlar statsıonarynyń boks-palatasyna jatqyzyldy. «Naýqastyń jaǵdaıy qanaǵattanarlyq. Hattamaǵa sáıkes bekitilgen tıisti emdik sharalar jasalyp jatyr. Dert oshaǵynda dezınfektsııalyq sharalar jasaldy, naýqas turǵan úı podezi karantınge jabyldy. Qazir jergilikti polıtsııa qyzmeti kúzetip tur. Ol adammen qarym-qatynasta bolǵandardyń bári anyqtalyp, oqshaýlandy», - dedi Aqtóbe oblystyq taýarlar men kórsetiletin qyzmetterdiń sapasy men qaýipsizdigin baqylaý departamentiniń baspasóz qyzmeti.
Al oblystyq densaýlyq saqtaý basqarmasynyń habarlaýynsha, 15 sáýir kúni saǵat 14:34-te jedel járdemge shaqyrý túsken. Brıgada arnaıy kıimmen naýqastyń úıine baryp, onyń úsh kúnnen beri dene qyzýy kóterilip, basy aýyrǵanyn, ózin álsiz sezingenin bildi. Keıin odan birden analız alynyp, tekserýge jiberdi.
«Naýqastyń aıtýy boıynsha shetelge, Aqtóbe qalasynyń syrtyna shyqpaǵan jáne koronavırýs juqtyrǵan adamdarmen buryn baılanysta bolmaǵan. 16 sáýir kúni saǵat 5:00-de dıagnoz zerthanalyq túrde rastaldy. Іndetke shaldyqqan adam dıspanserlik esepte tur. Júrek ıshemııasy, qant dıabeti, arterııalyq gıpertenzııamen aýyrady», - dep habarlaıdy oblystyq densaýlyq saqtaý basqarmasy.
