Aqtóbelik iri sharýa qojalyqtary áleýmettik máselelerdi sheshýge 500 mln teńge bóldi

AQTÓBE. QazAqparat - Aımaqtaǵy Qarǵaly aýdanynyń iri sharýa qojalyqtary aýyldardyń áleýmettik máselelerin sheshýge jáne damytýǵa 500 mln teńge bóledi, dep habarlaıdy QazAqparat.

Qarǵaly aýdanyna jumys sapary aıasynda Aqtóbe oblysynyń ákimi Eraly Toǵjanov qaıyrymdylyq jobasy qatysýshylarymen, aýyl sharýashylyǵy kooperatıvteriniń ókilderimen, sharýa qojalyqtarynyń basshylarymen kezdesti.

«Memleket basshysy Qasym-Jomart Toqaev Qazaqstan halqyna Joldaýynda aýyl sharýashylyǵyn damytý, aýyl sharýashylyǵy ónimi kólemin jáne onyń qosylǵan qunyn arttyrý strategııalyq mindet ekenin atap ótip, kooperatıvterdi damytýǵa 1 trln teńge bólýdi tapsyrdy.

Joba júzege assa, aýylda jumys oryndary qurylyp, mal men qus sany artyp, qatysýshylardyń tabysy eki esege kóbeıedi. Biz jaýapkershilikpen jumys isteýge daıyn aýyl turǵyndarynyń jobalaryn júzege asyrýǵa barlyq kómekti kórsetemiz», - dep atap ótti oblys ákimi.

Eraly Toǵjanov, sondaı-aq oblystaǵy eldimekenderdi ınternetpen qamtamasyz etý boıynsha qabyldanyp jatqan sharalar týraly aıtyp berdi.

Kezdesý barysynda Qarǵaly aýdanynyń ákimi Asqar Júsibalıev pen iri sharýa qojalyqtarynyń basshylary jalpy quny 500 mln teńgeni quraıtyn 8 memorandýmǵa qol qoıdy.

Aýdan aýmaǵynda jumys isteıtin iri sharýa qojalyqtary halyqtyń áleýmettik osal toptaryna turaqty túrde qaıyrymdylyq kómek kórsetip keledi.