Aqtóbelik ǵalymdar qorǵandardyń joıylyp bara jatqanyna alańdap otyr
AQTÓBE. QazAqparat - TMD elderiniń ǵalymdary «Marǵulan oqýlary - 2018» ǵylymı-praktıkalyq konferentsııasynda bas qosady. Konferentsııa kezinde «Uly Jibek jolynyń sakraldy geografııasy», «Tarıhı-mádenı mura eskertkishterin qorǵaý jáne paıdalaný týraly» zań jobasy talqylanbaq. Aqtóbelik ǵalymdar óndiris damyǵan kezde qorǵandardyń qorǵaýsyz qalǵanyn alǵa tartyp otyr, dep habarlaıdy QazAqparat tilshisi.
«Ǵalymdar ekonomıkanyń qarqyndy damýyna qarsy emes. Biraq biz qorǵandy qorǵaýǵa almasaq, jaǵdaı munan ári qıyndaı túsedi. Aqtóbe qalasynda jeke turǵyn úıge jer berilip jatyr. Ótken jyly sondaı qurylys jumystary kezinde tarıhı jádigerlerdi saqtap qalýǵa múmkindik týdy. Qazir Sazdy sý qoımasy, 41-razezden berilgen jerlerde qorǵandar bar. Bárine jer berildi, kommýnıkatsııalyq jeliler tartyldy. Bári sheshilip bolǵan soń biz baryp zertteý júrgizemiz. Al shyn máninde ákimdik jerdi bermes buryn komıssııa quramyna arheologtardy alýy shart. Sonda ǵana biz tarıhymyzdy saqtap qala alamyz», - dedi Á. Marǵulan atyndaǵy arheologııa ınstıtýtynyń Batys Qazaqstan aımaǵy boıynsha ókili, arheolog Arman Bısenbaev.
Ǵalymdar men zertteýshiler de qorǵandardyń naqty sanyn aıta almaıdy. Biraq ár aýylda kıeli jer baryn, úı salmas buryn zertteý jumystaryn júrgizý mańyzdy ekenin jasyrmaıdy. Ári óndiris, aýyl sharýashylyǵy qurylymdary tek aıyppulmen qutylyp, qylmystyq jaýapkershilikke tartylmasa bul úrdis toqtamaıdy dep otyr.
«Zań jobasyn Bilim jáne ǵylym, Mádenıet mınıstrlikteri usynyp otyr. Ulttyq mýzeı men Á. Marǵulan atyndaǵy arheologııa ınstıtýty talqylaýǵa qatysady. 1992 jyly qabyldanǵan zań bizdiń qundy járigerlerimizdi saqtaı almaı otyr. Zańdaǵy baptar álsiz, kádege aspaı jatyr. Prezıdent baı murany saqtaý kerek dep tapsyrdy. Al óndiriske, aýyl sharýashylyǵyna berilgen jerlerde eskertkishter joıylyp jatyr. Eshkim ózine jaýapkershilikti júktemeıdi. Ákimshilik jaýapkershilikke tartyp, aıyppul salady. Al Keńes Odaǵynda eskertkishti buzǵan adam 5-8 jylǵa bos bostandyǵynan aıyrylatyn bolǵan», - dedi Arman Bısenbaev.
Aıta keteıik, «Marǵulan oqýlary - 2018» ǵylymı-praktıkalyq konferentsııasy eki kúnge jalǵasady. Konferentsııaǵa Máskeý, Sankt-Peterbýrg, Qazan, Orynbor, Samara, Ýfa, Novosibir, Kıev, Baký, Tashkent, Bishkek, Nókis, Ázerbaıjan men Qyrǵyzstannan ǵalymdar, tarıhshylar qatysady. Mýzeı qyzmetkerleri de shaqyrylǵan.
