Aqtóbelik fýtbolshylar Grýzııadaǵy qarymta kezdesýde basym tússe, Eýropa lıgasynyń 3-shi raýndynda ızraıldiktermen kúsh synasatyn bolady
ALMATY. Shildeniń 19-y. QazAqparat /Erlik Erjanuly/ - Shildeniń 21-i kúni Vladımır Muhanov jattyqtyratyn aqtóbelik aıaqdopshylar syrt alańda Grýzııanyń Rýstavı qalasynda "Olımp" komandasymen qarymta kezdesýin ótkizedi.
Aqtóbede shildeniń 14-i kúni ótken oıynda V. Muhanovtyń shákirtteri qarsylastaryn 2:0 esebimen utqan bolatyn. Onda Bedıashvılı qorǵaǵan grýzındikter qaqpasyna soǵylǵan 2 dopty da komanda kapıtany Samat Smaqov engizdi. Endi olar qarymta kezdesýdi sátti ótkizse, 3-shi raýndta Izraıldiń "Hapoel" pen "Bosnııa men Gertsegovınanyń "Jeleznıchar" jubynyń jeńimpazymen kezdesedi. Olardyń arasynda kelesi aınalymǵa ótýge alǵashqy oıynda qarsylastaryn 5:0 esebimen oısyrata utqan telavıvtik aıaqdopshylardyń múmkindigi joǵary. Eýropa lıgasynyń 3-shi raýndy shildeniń 27/28 jáne tamyzdyń 3/4 kúnderi ótedi. Eger bul synnan súrinbese, aqtóbelikter alǵashqy saıysty óz alańynda ótkizetin bolady.
