Aqtóbelik esepshi memlekettik mekemeniń 45 mln teńgesin jymqyrǵan
AQTÓBE. QazAqparat - Aqtóbede memlekettik mekemeniń esepshisi 45 mıllıon teńgeni jeke qajettiligine jumsap jiberdi, dep habarlaıdy QazAqparat tilshisi.
«Geologııa jáne mınıraldyq resýrstar aqparattyq-taldaý ortalyǵy» sharýashylyq júrgizý quqyǵyndaǵy respýblıkalyq memlekettik kásiporynnyń oblystyq fılıalynyń esepshisi sot aldynda jaýap berdi.
№2 Aqtóbe qalalyq sotynda 31 jastaǵy M.Aıgúlge qatysty Qylmystyq kodekstiń «Senip tapsyrylǵan bóten múlikti ıemdenip alý nemese talan-tarajǵa salý» baby boıynsha is qaraldy. Aıyptaý qorytyndysyna súıensek, M.Aıgúl «Onlaın bankıngke» ıelik etip, 2015 jyldyń qańtary men 2018 jyldyń shilde aılary aralyǵynda mekeme esepshotyndaǵy qarjyny óziniń bank kartasyna aýdaryp otyrǵan. Nátıjesinde «Geologııa jáne mınıraldyq resýrstar aqparattyq-taldaý ortalyǵy» mekemesiniń oblystyq fılıaly 45 mıllıon teńgeden astam qarjysyn joǵaltty. Sot otyrysy kezinde sottalýshy M.Aıgúl óz kinásin moıyndap, aqshany jeke qajettilikterine jumsaǵanyn aıtyp berdi. Esepshiniń qylmystyq isi bala kútimine baılanysty demalysqa ketip, ózge esepshige qujat tapsyrý kezinde anyqtaldy.
«M.Aıgúl Qylmystyq kodekstiń «Senip tapsyrylǵan bóten múlikti ıemdenip alý nemese talan-tarajǵa salý» baby boıynsha aıypty dep tanylyp, 7 jylǵa bas bostandyǵynan aıyrý jazasy taǵaıyndalsyn. Jáne 10 jylǵa memlekettik jáne kommertsııalyq mekemelerde qarjyǵa jaýapty qyzmet atqarý quqyǵynan aıyrylsyn. Jazasyn qylmystyq atqarý júıesiniń qaýipsizdigi ortasha mekemesinde ótesin»,- dedi №2 Aqtóbe qalalyq sotynyń sýdıasy T.Aldanov.
Sonymen qatar, sottalýshy QR Indýstrııa jáne jańa tehnologııa mınıstrligine qarasty «Geologııa jáne mınıraldyq resýrstar aqparattyq-taldaý ortalyǵy» mekemesine 45 mıllıon teńge materıaldyq shyǵyndy óteýi tıis.
