Aqtóbelik eriktiler qurǵap qalǵan ózen balyqtaryn qutqarýda

AQTÓBE. QazAqparat – Aqtóbe qalasynyń ortasymen aǵatyn Sazdy ózeni qurǵap ketti. Eriktiler balyqtardy jınap, Elek ózenine qaıta jiberdi, dep habarlaıdy QazAqparat tilshisi.

Qazirgi kezde qaladaǵy ózenderdiń arnasy tartylyp, Sazdy sý qoımasynyń basym bóligi qurǵap qaldy. Al qala ishine kiretin bóligi batpaqqa aınaldy. Shabaqtar kishkentaı laı sýǵa jınala bastady.

«Balyqtardyń qyrylatynyn kórip, beıjaı qala almadyq. Sóıtip eriktiler úsh kún boıy balyq aýlap, Elek ózenine qaıta jiberdi. Qara kúshti qajet etetin jumysqa alǵashynda 10 adam keldi, keıin 5 adam ǵana birikti. Shabaqtarmen qatar balyqtar da ózendi mekendegen. On túrin anyqtap, bárin qaıta jiberdik. Sý sorý quraly da paıdalanyldy. Aldaǵy ýaqytta jumysty jalǵastyrǵymyz keledi, bizdiń qatarymyzǵa qosymda kúsh qajet», - dedi «Dyshı Aktobe» eriktiler tobynyń uıymdastyrýshysy Evgenıı Lazarchýk.

Sonymen qatar, eriktiler jaz boıy bulaq kózin ashyp shyqty. Olar ár jeksenbi kúni jınalyp, Sazdy ózeniniń boıyndaǵy bulaqtardy qalpyna keltirdi.

«Bıyl 12 bulaqtyń kózi ashyldy. Bul jumys ár demalysta jalǵasady. Qara kúshti qajet etetin jumys keıde sharshatyp jiberedi. Biraq tabıǵat janashyrlarynyń qatary áli de tolyǵa túsetinine senemiz. Ári «Dyshı Aktobe» eriktiler toby Ekologııa týraly kodeksti talqylap, eki usynys berdi. Birinshisi, jer jeke menshikke berilgenimen ondaǵy jasyl jelek, sý arnasy saqtalýy, qorǵalýy tıis. Ekinshiden, elektr jelisine kedergi keltiredi dep qalada aǵashtardy ońdy-soldy kesý beleń alǵan. Qazir aǵashtardyń bári ársiz, qısyq ósip jatyr. Olar aǵash kesý zańdylyqtaryn saqtaýy tıis», - dedi Evgenıı Lazarchýk.

Aıta ketsek, Aqtóbe qalasyndaǵy 8 ózenniń arnasyn tazartý jumysy biraz talas týdyrdy. Prezıdent Qasym – Jomart Toqaevtyń tapsyrmasymen Ekologııa, geologııa jáne tabıǵatty qorǵaý mınıstri Maǵzum Myrzaǵalıev Aqtóbege kelip, jumysty ýaqytsha toqtatty.