Aqtóbelik eriktiler iz-túzsiz joǵalyp ketken stýdentti ıisshil ıtpen izdestirip jatyr
AQTÓBE. QazAqparat - Aqtóbe oblysynyń Oıyl aýdanynda bilim alyp júrgen Erbol Ábdiǵalı 20 kún buryn joǵalyp ketti. Eriktiler dala men qańyrap turǵan ǵımarattardy, baý-baqsha ujymdaryn aralap júr, dep habarlaıdy QazAqparat tilshisi.
Erbol Ábdiǵalı bir aıdan soń 18 jasqa tolady. Ol Aqtóbe qalasynda týystarynyń úıinde turǵan, keıin Oıyl aýdanyndaǵy oqý ornyna qaıta oralmaq bolǵan. Biraq sol kúni habarsyz ketip, birneshe kúnnen soń týystary polıtsııa bólimine aryz túsiredi. Іzdeý jumystary júrgizilip jatqanymen, esh nátıje joq. Qazirgi kezde aqtóbelik eriktiler ıisshil ıttiń kómegimen baý-baqsha ujymyn, qańyrap turǵan ǵımarat ishi men dalaly jerlerde izdeý jumystaryn jalǵastyrdy.
«Erboldan esh habar joq. Ol aýylǵa baratyn taskıge minbegen. Bizdiń oıymyzsha, ol Aqtóbe qalasynda bolýy múmkin. Sebebi, avtovokzal, temirjol vokzaly men taksı qyzmetinen surastyrǵan bolatynbyz. Ol bılet almaǵan. Biz qala ishindegi kópqabatty úılerdiń jertólesin de qarap shyqtyq», - dedi erikti Baqytǵalı Orazǵalıev.
Eske salsaq, Erbol Ábdiǵalı 17 aqpan kúni joǵaldy. Sodan beri ony kórgen eshkim joq.
