Aqtóbelik eriktiler gýmanıtarlyq kómekpen birge Qostanaıǵa attandy

AQTÓBE. QazAqparat - Aqtóbeniń barlyq aýdanynda Qostanaıǵa gýmanıtarlyq kómek jınalyp jatyr. Óńirde Qostanaıǵa taǵy bir júk kóligi jóneltildi. Eriktiler de ere ketti, dep habarlaıdy QazAqparat tilshisi.

Aqtóbe oblysynan kórshi óńirge dári-dármek, kıim-keshek, azyq-túlik, jeke gıgıena zattary bar gýmanıtarlyq avtokerýen shyqty. Igi bastamaǵa iri saýda jelileri men metsenattar ǵana emes, qala men aýdan turǵyndary úles qosty. «AMANAT» partııasynyń fılıaldarynda 13 gýmanıtarlyq kómek qabyldaý pýnkti ashylyp, partııa ókilderi, eriktiler, stýdentter men «Jastar rýhy» qatarynan volonterler jasaqtaldy. Alǵashqy gýmanıtarlyq kerýen kórshi óńirdiń zardap shekken aýdandaryna jetkizildi.

«4 qyrkúıekte saǵat 9.00-den bastap partııanyń qalalyq fılıaly janynan gýmanıtarlyq kómek qabyldaý pýnkti ashyldy. Gýmanıtarlyq kómekpen alǵashqy júk Aqtóbeden Qostanaı oblysyna sol kúni keshke jóneltildi. Endi biz qosymsha 35 tonna jiberip otyrmyz. Bul joly aýdan turǵyndary da úles qosty», - dedi «AMANAT» partııasynyń Aqtóbe oblystyq fılıalynyń atqarýshy hatshysy Erbol Danaǵulov.

Oblys turǵyndarynyń kúshimen qant, maı, jarma, kúrish, kıim-keshek, birinshi kezekte qajetti zattar, tósek-oryn jabdyqtary, sondaı-aq turmystyq tehnıka sııaqty azyq-túlik jınaldy. Sonymen qatar Qostanaı oblysyna «Jastar Rýhy» jastar qanatynyń eriktileri attanady. Olar qalpyna keltirý jumystaryna qatysyp, kómek kórsetýge jáne taýarlar taratýǵa kómektesedi.

«Jastar Rýhy» jastar qanatynyń oblystyq fılıalynyń tóraǵasy Ánýar Esqara zardap shekkenderge eriktilerdiń ózderi kómektesýge nıet bildirgenin atap ótti. Onyń aıtýynsha, gýmanıtarlyq kómekti jınaýǵa jáne tıeýge eriktiler, stýdentter, «Jastar rýhy» qatarynan 150-den astam adam qatysty.

Aıta keteıik, arnaıy kıim tigetin fabrıka da 6 mln teń bolatyn kıim-keshek berdi. Kásipker Nadejda Shabaevanyń aıtýynsha, kún sýytqan kezde bul óte qajet kómek.

Eske salsaq, alǵashqy kómek 4-qyrkúıek kúni jóneltildi.