Aqtóbelik dzıýdoshy oblys ákiminen 500 myń teńge aldy
AQTÓBE. QazAqparat - Aqtóbe oblysynyń ákimi Berdibek Saparbaev álem chempıonatynda qola medal alǵan Janbolat Baǵytbergenovke 500 myń teńgeniń sertıfıkatyn berdi. Ol Bagam aralynda ótken jarysta jastar arasynan el namysyn qorǵady, dep habarlaıdy QazAqparat tilshisi.
Aqtóbe oblysynyń ákimi Berdibek Saparbaev dzıýdoshy Janbolat Baǵytbergenovpen kezdesti. Ol qazan aıynda Nassaý (Bagam araly) qalasynda ótken jastar arasyndaǵy dzıýdodan álem chempıonatynda qola medal aldy. Bul álem chempıonatyna qatysqan qazaqstandyqtardyń jalǵyz júldesi boldy. Ári Aqtóbe oblysynyń jastary arasyndaǵy dzıýdonyń tarıhynda alǵashqy medal osy. Birinshilikke barlyǵy 79 elden kelgen 492 sportshy qatysqan edi.
«Bul Qazaqstan úshin, atap aıtqanda Aqtóbe úshin úlken jeńis. Sen áli jassyń. Nebári jıyrmadasyń, ıaǵnı, sporttyq mansabyńdaǵy alar asýyń áli alda. Bastysy erinbeı, ózińe kúsh-jiger jumsap, sheberligińdi shyńdaýǵa kóńil bólý kerek. Oǵan qosa, kele jatqan jyl - lıtsenzııalyq. Sondyqtan Tokıoda ótetin Olımpıada oıyndarynda seniń de qatysatynyńa senemiz»,- dedi Berdibek Saparbaev.
Óńir basshysy, sondaı-aq, sportshyǵa oblystyq dzıýdo federatsııasy atynan 500 myń teńge kólemindegi aqshalaı syıaqynyń sertıfıkatyn tabys etti. Óz kezeginde Janbolat Baǵytbergenov alǵys aıtyp, joǵary nátıjege qol jetkizý úshin ári qaraı da bar kúshin salatynyna ýáde berdi.
