Aqtóbelik dızaıner qazaqtyń ulttyq kıimin sheteldegi sán kórsetilimine aparady

Turmysqa shyǵyp, ózgelerden erekshe sándegi kóılek kıgisi kelgen Sabına Janzaqova mata alyp, tiginshige barady. Biraq sheberler toı kóılegin tigýden bas tartqan. Sol kezde dızaıner Sábına Janzaqova arnaıy syzbasyn daıyndap, kóńili qalaǵan kóılekti kıdi. Adamdardyń tańdanysyn týdyrǵan jańa sán suranysqa ıe bolyp, ol ulttyq kıim tigýdi qolǵa aldy. Qazir álemniń ár túkpirinde bolyp jatqan sán kórsetilimderine qatysady. Ol eresek adamdarǵa, balalarǵa kıim tigedi.

«Aqtóbelikter toı kóılekterine jıi tapsyrys beredi. Jas kelinge arnalǵan kóılektiń bárinde ulttyq oıý-órnegimiz bar. Balalardyń kıimine de suranys joǵary. Men Qazaqstan, Aqtóbe atynan shetelge baryp, óner kórsetetin balalardy kıindiremin. Ánshi, bıshi balalar úshin ulttyq kıim zamanaýı úlgide tigilýi kerek. Sonymen qatar, halyqaralyq kórmelerge arnaıy daıyndaımyz. Taıaýda Sýn Ksenııa Grýzııada ótken halyqaralyq konkýrsqa qatysyp, І oryndy jeńip aldy. Ózime balalarmen jumys istegen unaıdy»,- dedi kásipker Sabına Janzaqova.

Aqtóbelik tiginshiler men dızaınerler úshin mata jetkizý qıyn. Al dúkenderdegi baǵa qymbat. Sondyqtan keıde ulttyq ónim óte qymbatqa shyǵady. Mata jetkizý, tapsyrys berý kezinde kásipkerlerge ákimdik kómek berse, ulttyq kıimniń de suranysy artady degen senimde kásipker.

«Sáýkele monshaqtary arnaıy tigiledi. Máselen, monshaqpen órilgen jasyl sáýkeleni 1 aı tigýge týra keldi. Bul shydamdylyq pen uqyptylyqty qajet etetin jumys. Sońǵy jyldary adamdar ulttyq kıimge áýes, qyzyǵýshylyq artty. Buryn izdep, taba almaıtyn edi. Biz ony tigýdi usynamyz. Tipti, kelinge arnalǵan oıýly oramal da suranysta bar. Aldymen ózime dep tigip, keıin dostarym, tanystarymnyń suranysy artty. Jalǵa berýge surady, qaıdan alǵanym qyzyqtyrdy. Sodan keıin ulttyq kıim tigetin atele ashýdy josparladym. Suranys kóp, jastar qyzyǵady. Din jolyndaǵy qyzdar da sándi kıim kııýdi qalaıdy. Ulttyq naqyshpen tigip beremiz»,- dedi Sabına Janzaqova.

Dızaıner ári tiginshi shetelge jıi shyǵyp, sán kórsetilimine barady. Qazaqtyń ulttyq kıimine qyzyǵýshylar sany artyp kele jatqanyn qýana jetkizgen kásipker aldaǵy ýaqytta Grýzııany baǵyndyrmaq.

«Sońǵy ret Dýbaıǵa bardyq. Qazaqtyń ulttyq kıimin kıgen balalar qyzyl kilemmen 4 ret júrip ótti. Sebebi, bul sán kórsetilimine kelgen kórermenniń suranysy boldy. Bári sýretke túsirip, balalarmen tildesti. Qazaqtyń ulttyq kıimi óte ádemi jáne baı. Grýzııada ótken sheberlik sabaǵyna qatysqan kezde maǵan eshkim kóńil aýdarmady. Eń jasy men boldym. Sońǵy kúni ár atele óz kıimderin tanystyrdy. Sol kezde bári tańyrqap, fotosessııa jasaldy. Ókinishke qaraı, men tikken kóılek grýzın qyzdaryna saı kelmeı, ózim kıim fotosessııasyn jasadym. Sánger bolyp, qalany araladym. Sapar kezinde kóktemde ótetin sán kórsetilimine shaqyrtý aldym. Baryp, Qazaqstandy tanytqym keledi»,- dedi ol.

Ispanııa, Italııa, BAÁ-de ótken sán kórsetilimderine qatysyp, balalardyń ulttyq kıimi bas júldeni aldy. Endigi armany - Grýzııada ótetin sán aptalyǵyna qatysyp, jeńiske jetý.

«Ózim dızaınyn syzyp, tigemin. Sonymen qatar, 6 tiginshini jumysqa aldym. Olardyń arasynda kóılekke qajetti dekoratıvti buıymdar tigetin, sáýkeleni monshaqpen kórkemdeıtin tiginshiler bar. Bárin ózim baqylap otyramyn. Kúnde jumys, tapsyrys. Túngi 2-de, tańǵy 8-de tapsyrysty bitirip jatamyz. Sońǵy ýaqytty óner adamdary tapsyrys berip júr. Biz táj, syrǵa daıyndap bere alamyz. Áleýmettik jelide arnaıy paraqsha bar. Biraq ulttyq kıimder túsirilgen sýret adamdarǵa ótimsiz. Ony kıip, syrǵany taǵyp júrý kerek. Sol kezde adamdar qyzyǵady, suraı, satyp alady. Sán aptalyǵyna barǵanda sol sátte satyp alatyn jaǵdaı kezdesedi»,- dedi kásipker.

Sabına Janzaqova óz kıimderiniń úlgisin «Kúnkeı» dep atady. Anasy kishkentaıynda erkeletip, qyzyna Kúnkeı dep at qoıǵan. Sán áleminiń jas dızaıneri de ulttyq kıim tigýdi qolǵa alǵanda birden mán-maǵynasy tereń brendti tańdady. Dızaıner jergilikti sángerlermen birge jumys istep, sheteldegi sán aptalyqtaryna jıi barýdy maqsat etip otyr.