Aqtóbelik depýtattar eki aýdanǵa Almaty men Astana ataýyn berýdi qoldady
AQTÓBE. QazAqparat - Aqtóbe oblystyq máslıhaty qalada qurylǵan eki aýdanǵa Astana men Almaty ataýyn berýdi qoldady. Usynys respýblıkalyq onomastıka komıssııasyna joldandy, dep habarlaıdy QazAqparat tilshisi.
Aqtóbelikter eki aýdandy quryp, oǵan Astana men Almaty ataýyn berýdi talqylaǵan bolatyn. Buǵan deıin habarlaǵanymyzdaı, drama teatr men qalalyq mádenıet úıinde qoǵamdyq tyńdaý ótip, Astana, Almaty, Elek pen Qarǵaly, Ábilqaıyr han, Eset batyr, Bókenbaı batyr, Alash pen Azat ataýyn berý usynyldy. Keıin qalalyq máslıhat depýtattary eki aýdanǵa Almaty men Astana ataýyn berýdi qoldap, búgin bul suraq oblystyq málıhatta qaraldy. Depýtattardyń aldyna shyqqan qala ákimi Іlııas Ispanov aýdandarǵa ataý berýdiń basymdyǵyna toqtaldy.
«Astana men Almaty ataýlary usynylyp, kópshilik qoldady. Astana - Qazaqstan Respýblıkasynyń elordasy. Astana eldiń ortalyǵy degen mańynany bildiredi. Ári Astananyń 20 jyldyǵy bolady. Osy ýaqyt aralyǵynda Astana arqyly dúnıejúzi elimizdi tanydy. Al Almaty 1929 jyldan bastap 1997 jylǵa deıin Qazaqstannyń astanasy boldy. Rýhanı, qarjylyq, mádenı ortalyǵymyz bolyp qalady. Eki qala da qarqyndy damyp keledi. Balanyń atyn bergende sol atqa saı bolsyn dep armandap qoıatyn bolǵan. Halyqtyń usynysy da osyǵan saıady», - dedi qala ákimi Іlııas Ispanov.
Aıta keteıik, usynys boıynsha temirjoldyń bir jaǵy Almaty, ekinshi beti Astana bolady. Aldaǵy ýaqytta qaladaǵy bes selolyq okrýg ákimdigi joıylyp, eki aýdanǵa beriledi. Oblystyq máslıhat sessııasynda depýtat Nurlan Saǵynalın aldaǵy ýaqytta Astana men Almaty qalalarynyń ákimin shaqyryp, jańa aýdannyń tusaýkeserin jasaýdy surady. Sessııa kezinde oblystyq máslıhat depýtattary usynysty biraýyzdan qoldady.
