Aqtóbelik dárigerler jańa týǵan sábıdiń júregine ota jasady
AQTÓBE. QazAqparat - Aqtóbede týabitti júrek aýrýyna shaldyqqan sábıge dárigerler shuǵyl ota jasady, dep habarlaıdy QazAqparat tilshisi.
Aqtóbeniń Temir aýdany, Shubarqudyq aýylynda 4 qańtar kúni týabitti júrek aqaýymen Hamza esimdi sábı dúnıege keldi. Dárigerler birden telemedıtsına arqyly baılanysqa shyǵyp, keńes berdi. Kardıohırýrgter sanavıatsııa jiberý týraly shuǵyl sheshim qabyldaǵan-dy. Oblys ortalyǵyna jetkizilgen balaǵa ota jasaldy.
«Sábı Aqtóbe medıtsınalyq ortalyǵynyń balalar statsıonary, kardıoreanımatsııalyq bólimshesine ornalastyryldy. Qosymsha tekserý júrgizilip, sábıge «ókpe arterııasy klapanynyń atrezııasy» dıagnozy qoıyldy. Syrqat saldarynan ottegi jetpeı, balanyń terisi kógerip ketken. Kúrdeli ota kezinde qan aınalymyn birqalypqa túsirý úshin jasandy apparat ornatyldy. Ota sátti aıaqtalyp, sábı saýyǵyp kele jatyr. Dári-dármek jetkilikti, shaqalaq dárigerlerdiń úzdiksiz baqylaýynda. Qazir naýqas sábı tabıǵı jolmen tynys alyp jatyr. Bala uzaq emdeledi ári júrek transplantatsııasy qajet», - dep habarlady oblystyq densaýlyq saqtaý basqarmasynyń baspasóz qyzmeti.
Aıta keteıik, Aqtóbe medıtsınalyq ortalyǵynda týabitti júrek aqaýyna shaldyqqan balalarǵa kómek berý úshin arnaıy top qurylǵan. Top úsh jyldan beri tek Aqtóbe oblysy emes, elimizdiń batys óńirindegi balalarǵa kómek berip keledi.
