Aqtóbelik dárigerler týberkýlezge shaldyqqan oqýshyǵa qatysty túsinik berdi
AQTÓBE. QazAqparat - Aqtóbe qalasyndaǵy orta mektepte 4-synyp oqýshysy týberkýlezge shaldyqqan. Dárigerlerdiń aıtýynsha, qurt aýrýynyń bul túri qorshaǵan ortaǵa zııanyn tıgizbeıdi, dep habarlaıdy QazAqparat tilshisi.
Aqtóbedegi orta mektep oqýshysynan týberkýlez anyqtaldy. Talap boıynsha mektepte eshqandaı da karantın jarııalanbaıdy. Degenmen, qazir mektep ákimshiligi ata-analardyń mektepke kirýine tyıym salyp, betperdemen júrý týraly talap qoıǵan.
«Qazir Aqtóbede epıdemıologııalyq jaǵdaı turaqty. Osy jyldyń 10 aıyn qorytyndylasaq, qurt aýrýyna shaldyǵý 11,2 paıyzǵa tómendedi. Onyń ishinde balalar arasynda 28 paıyzǵa azaıdy. Al №10 orta mekteptegi jaǵdaıǵa keler bolsaq, 5 qazan kúni qalalyq qoǵamdyq densaýlyq saqtaý basqarmasyna habarlama tústi. Habarlama boıynsha jedel túrde tekserý bolyp, mektepke dezınfektsııa júrgizildi. Aýrý belgileri anyqtalǵan balalar qosymsha tekserýge jiberildi. Balanyń úıindegi 5 adam tekserýden ótip, densaýlyqtarynan esh kinárat tabylmady. Jetkinshektiń jaz mezgilinde Atyraý oblysy, Qulsary qalasynda demalǵany anyqtaldy. Biz Qulsarydaǵy qoǵamdyq densaýlyq saqtaý basqarmasyna jedel habarlama túsirdik»,- dedi Aqtóbede oblystyq qoǵamdyq densaýlyq saqtaý basqarmasynyń basshysy Nursulý Berkimbaeva.
Qazir oqýshy em qabyldap jatyr. Týberkýlezdiń bul túri qorshaǵan ortaǵa qaýipti emes.
«Bala em alyp jatyr, jaǵdaıy jaqsy. Týberkýlezdiń jeńil túri dep aıtýǵa bolady. Dıaznozy - ókpe qýysyndaǵy bezdiń týberkýlezi. Balalarǵa, adamdarǵa zııany joq. Al mektep oqýshylaryna jappaı mantý synamasyn salý - josparly jumys. Qazir ár emhanada ftızıatr dáriger bar. Eger balanyń mantý synamasy isip ketse, ári qaraı tekserý júredi»,- dedi Aqtóbe oblystyq týberkýlezge qarsy dıspanserdiń bas dárigeri Erlan Tátimov.
Aıta keteıik, Aqtóbe oblysy boıynsha bıyl 9 baladan týberkýlez derti anyqtaldy. Barlyǵy 700-ge jýyq bala arnaıy saýyqtyrý oryndarynda em qabyldap jatyr. Erlan Tátimovtyń aıtýynsha, bıyl barlyǵy 18 adam qurt aýrýynan kóz jumǵan. Oblys boıynsha týberkýlezge qarsy em júrgizý úshin 5 aýdanda sanatorıı jumys istep tur.
Eske salaıyq, Aqtóbede mektep oqýshysynan týberkýlez anyqtalyp, oqýshylar men muǵalimder jappaı tekserýden ótken bolatyn.
