Aqtóbelik dárigerler tól mereke kúni jetim balalardyń esepshotyn tolyqtyrdy

AQTÓBE. QazAqparat - Aqtóbelik dárigerler 5 jetim balanyń Turǵyn úı qurylys jınaq bankindegi esepshotyna aqsha aýdardy, dep habarlaıdy QazAqparat tilshisi.

Aqtóbede Balalar jyly jarııalanyp, «Baqytty bala» jobasy qolǵa alynǵan bolatyn. Dárigerler joba aıasynda tól mereke kúni jetim balalardy qamqorlyǵyna aldy. Aqtóbe oblystyq densaýlyq saqtaý basqarmasynyń basshysy Áset Qalıevtiń aıtýynsha, Alǵa balalar úıi tárbıelenýshileriniń baspanaǵa dep jınap jatqan esepshotyna 500 myń teńge salyndy. Bul úrdis, qaıyrymdylyq ári qaraı jalǵasady.
 

Aıta keteıik, Medıtsına qyzmetkerleri kúni saltanatty shara ótip, oblys ákimi Berdibek Saparbaev aq halattylardy quttyqtady.

«Elbasynyń qoldaýynyń arqasynda Qazaqstannyń densaýlyq saqtaý júıesi medıtsınalyq qyzmet kórsetýdiń jańa sapaly deńgeıine shyqty. Bizdiń oblystaǵy 10 myńnan astam medıtsına qyzmetkeri otandyq medıtsınanyń damýyna úles qosyp, emdeýdiń zamanaýı ádisterin engizýge jaǵdaı jasap keledi. Nátıjesinde halyqtyń ómir súrý uzaqtyǵy 73,5 jasqa jetip, týý ósimi 3,6 paıyzdy qurady. Jalpy ólim-jitim 10,9% tómendegen. Óńirlik medklasterdiń ashylýymen Batys óńiriniń halqyna kórsetiletin joǵary tehnologııalyq medıtsına qyzmetteriniń kólemi aıtarlyqtaı keńeıdi», - dedi oblys ákimi Berdibek Saparbaev.

Mereke kúni medıtsına salasynyń qyzmetkerleri arnaıy granttar alyp, 500 myń teńge kóleminde syıaqyǵa ıe boldy. Al bilikti alty dárigerge páter kilti tabys etildi. Barlyǵy on aýdandyq medıtsına mekemesi qyzmettik kólik sertıfıkatyn aldy.