Aqtóbelik dárigerler tańdaıy joq tórt aılyq sábıdiń otbasyn baqylaýǵa alady
AQTÓBE. QazAqparat - Aqtóbedegi sý tasqyny kezinde baspanasyz qalyp, mektepti panalaǵan Qyrqynbaevtar áýletiniń kishkentaıy Aıym Dýlatbekqyzyn dárigerler baqylaýǵa alady. Bul týraly oblystyq densaýlyq saqtaý basqarmasynyń basshysy Áset Qalıev aıtty, dep habarlaıdy QazAqparat tilshisi.
Aqtóbedegi sý tasqyny kezinde salqyn tıip, qyzýy kóterilgen balalar aýrýhanaǵa jatqyzylyp, emdeldi. Aralarynda sheshek aýrýyna shaldyqqan balalar da anyqtaldy.
«Sý tasqyny kezinde medıtsına qyzmetkerleri belsendi jumys istedi. Árbir mektepte kezekshi boldy. Saıajaıǵa qonystanǵandardyń kóbi aýyldan kóship kelip, tirkeýge alynbaǵan eken. Biz ári qaraı esepke alý jumysyn jalǵastyramyz», - dedi oblystyq densaýlyq saqtaý basqarmasynyń basshysy Áset Qalıev.
Al sý tasqyny kezinde otbasy baspanasyz qalyp, mektepke qonystanǵan, keıin páter jaǵalap ketken Qyrqynbaevtar áýletiniń kishkentaıy Aıym Dýlatbekqyzyn dárigerler óz baqylaýyna alatyn boldy. Tańdaıy joq 4 aılyq sábı ana sútimen emes, daıyn ezbemen qorektenedi. Ol osy ýaqytqa deıin ózine tıesili tegin tamaqty almaı kelgen.
«Emhana oǵan medıtsınalyq kómek kórsetedi. Eger esepke alynsa qajet dárini berip, qosymsha tamaqtandyrady»,- dedi Áset Qalıev.
Buǵan deıin habarlaǵanymyzdaı, Aıym Dýlatbekqyzynyń týa bitti tańdaıy joq . Dárigerler jasandy tańdaı salý otasy týraly naqty aqparat bermegen.
