Aqtóbelik dárigerler óńeshine jerjańǵaq turyp qalǵan balany aman alyp qaldy
AQTÓBE. QazAqparat - Aqtóbelik dárigerler jerjańǵaq óńeshine turyp qalǵan balany qutqaryp qaldy, dep habarlaıdy QazAqparat tilshisi.
Aqtóbe oblysy Shalqar aýdanynda oqys oqıǵa tirkeldi. Bar bolǵany 1 jasqa tolǵan Altaır jerjańǵaqtyq túıirin jutyp, tynys alýy kúrt qıyndaıdy. Kómekke sanavıatsııa shaqyryldy.
"Balam jańǵaq jutyp, jaǵdaıy nasharlap ketti. Jedel járdem shaqyryp, kómek suradym. Keıin sanavıatsııa tobyndaǵy arnaıy mamandar kelip, ota jasady", - dep jazdy balanyń anasy Indıra Danabaeva.
Aýdandyq aýrýhanadan túsken shaqyrýdan soń dárigerler jolǵa shyqty. Alaıda sol kúni sanavıatsııa aýa raıyna baılanysty usha almady. Dárigerler 500-600 shaqyrym qashyqtyqta jatqan aýdanǵa shyǵyp, medıtsınalyq kómek kórsetti. Sebebi, sábıdiń tynys alý júıesine bógde zat turyp qalyp, ómirine qaýip tóndire bastady.
"Balanyń jaǵdaıy nasharlap, jótelip, daýysy shyqpaı qalǵan. Uıyqtatatyn dári egilip, bronhoskopııa jasaldy. Jańǵaq túıiri óńeshtiń teń jartysyn jaýyp qalǵan eken. Kedergi keltirgen jańǵaq alynyp tastaldy", - dep habarlady oblystyq densaýlyq saqtaý basqarmasy.
