Aqtóbelik dárigerler koronavırýs juqtyrǵan naýqastyń jaǵdaıy týraly aıtty
AQTÓBE. QazAqparat – Aqtóbede koronavırýs juqtyrǵan naýqas juqpaly aýrýlar aýrýhanasynda emdelip jatyr. Jaǵdaıy turaqty dep baǵalanýda, dep habarlaıdy QazAqparat tilshisi.
Aqtóbe oblysy ákimdigi janyndaǵy jedel shtab málimetine Aqtóbe oblysynda epıdemıologııalyq jaǵdaı turaqty. Oblysta 161 adam statsıonarlyq karantınde jatyr. Onyń ishinde 107-i Aqtóbe qalasynda, 54-i oblys aýdandarynda. Al koronavırýs ınfektsııasyn juqtyrǵan naýqas ınfektsııalyq aýrýhanasynda em qabyldap jatyr. Jaǵdaıy turaqty, temperatýrasy jáne tynysy qalypty. Halyqaralyq poıyzdar qatynasy toqtatyldy. Oblys aýmaǵy arqyly ótetin respýblıkaishilik baǵyttar qysqartyldy.
Turǵyndardyń medıtsınalyq maskalarmen qamtamasyz etý 84,7% quraıdy. Az qamtylǵan sanattaǵy 943 otbasyna 12,5 mln teńge kóleminde qaıyrymdylyq kómek kórsetildi. Aqtóbe qalasy men aýdandarda dezınfektsııalyq jumystar júrgizilýde.
Oblysta negizgi azyq-túlik taýarlarynyń 32 túri boıynsha jetkilikti qor quryldy. Call-ortalyqqa (906-606) turǵyndar tarapynan 1048 suraq tústi. Túsken suraqtardyń barlyǵy sala boıynsha tıisti basqarma basshylaryna jáne qala jáne aýdan ákimderine shara qoldaný úshin joldandy. Qoǵam jáne memlekettik organ ókilderinen turatyn TJ rejıminiń saqtalýyna qoǵamdyq baqylaý toptarynyń jumysy nátıjesinde 59 tártip buzýshylyq faktileri anyqtalyp, kóńil kóterý oryndary men kompıýterlik klýbtardyń ıeleri ákimshilik jaýapqa tartyldy.
