Aqtóbelik dárigerler avtobýsta shabýylǵa ushyraǵan naýqas týraly aıtty
AQTÓBE. QazAqparat - Aqtóbede Máskeýden Qyrǵyzstanǵa bet alǵan avtobýsqa qaraqshylyq shabýyl jasalyp, bir adam jaraqattanǵan bolatyn. Búgin aqtóbelik dárigerler onyń densaýlyq jaǵdaıy týraly aıtty, dep habarlaıdy QazAqparat tilshisi.
Buǵan deıin habarlaǵanymyzdaı, oqıǵa 6 sáýir kúni túngi saǵat 1 shamasynda bolǵan. Aqtóbe qalasy mańynda shaǵyn avtobýsqa qaraqshylyq shabýyl jasalyp, ishinde bolǵan jalǵyz jolaýshyǵa oq tıdi. Keıin onyń ulty tájik Reseı azamaty ekeni anyqtaldy. Oq atqan kúdiktiler onyń altyn buıymdary men aqshasyn alyp ketken. Jaralanǵan jolaýshy Temirjol aýrýhanasyna jetkizildi.
«Naýqas kóp qan joǵaltqan. Onyń keýde tusyna, ıyǵyna oq tıgen. Ota jasaldy. Qazirgi kezde naýqastyń jaǵdaıy birqalypty aýyr dep baǵalanyp otyr. Ol Temirjol aýrýhanasynyń travmatologııa bóliminde em qabyldap jatyr», - dedi emdeýshi dáriger Han Oleg.
Aýrýhanaǵa túsken 35 jastaǵy azamattyń qansha ýaqyt em qabyldaıtyny belgisiz. Emdeýshi dárigerleri naýqaspen tildesýge tyıym salǵan.
Atalǵan fakti boıynsha tergeý júrip jatyr.
