Aqtóbelik dárigerler AQSh azamatyna sátti ota jasady
AQTÓBE. QazAqparat – Aqtóbe medıtsına ortalyǵy mindetti medıtsınalyq saqtandyrý júıesi arqyly sheteldikterge de em júrgizip jatyr. Neırohırýrgter uzaq jyldan beri Aqtóbede turatyn muǵalimge ota jasady, dep habarlaıdy QazAqparat tilshisi.
Mindetti áleýmettik medıtsınalyq saqtandyrý júıesi josparly ota jasaýǵa múmkindik beredi. Quny qymbat operatsııalar aı saıyn jarna aýdaryp otyrǵan adamdar úshin tegin.
«Naýqas aqpan aıynda jedel járdem brıgadasymen Aqtóbe medıtsına ortalyǵyna jetkizildi. Ony neırohırýrgııa bólimine ákelgen soń tekserý júrgizildi. Keıin bel omyrtqa jaryǵy anyqtalyp, endoskopııalyq ota jasaýǵa týra keldi. Úsh kúnnen soń naýqas úıine jiberildi. Naýqas AQSh azamaty, sońǵy 10 jylda óńirde muǵalim bolyp júr eken», - dedi Aqtóbe medıtsına ortalyǵy neırohırýrgııa bóliminiń meńgerýshisi Erjan Ozǵanov. Ota quny – 1,2 mıllıon teńge. Al ońaltý jumysyna 350 myń teńge jasalady. Biraq saqtandyrý júıesi arqyly sheteldik emdi tegin qabyldap júr. Qazir ońaltý jattyǵýlaryn jasaıdy.
«Bir aı buryn ota jasattym. Operatsııa sátti ótti. Aq halattylardyń kómegi zor. Qazirgi kezde densaýlyǵym jaqsy, omyrtqam da qalypqa túse bastady. Shynymdy aıtsam, 15 jyl buryn otany AQSh-ta jasattym. Aqtóbelik dárigerler de dál solaı sapaly jumys istedi. Kózimdi ashqan kezde eki dáriger ár qadamdy túsindirdi. Rızamyn», - Neıton Loler.
