Aqtóbelik dáriger: Eń aldymen otbasymdy dertten qorǵaý úshin vaktsına qabyldadym
AQTÓBE. QazAqparat - Aqtóbede 700-den astam medıtsına qyzmetkeri vaktsına aldy. №3 Aqtóbe qalalyq emhanasynyń bólim meńgerýshisi Roza Nurjanova naýqastardy qabyldaıtyn qyzmetkerler úshin vaktsınanyń mańyzy zor dep esepteıdi, dep habarlaıdy QazAqparat tilshisi.
Aqtóbe oblysy boıynsha qazir 700-ge jýyq adam úı karantıninde jatyr. Olardyń bári medıtsına qyzmetkerleriniń baqylaýynda. Koronavırýs ınfektsııasymen kúres jumystary kezinde aldyńǵy qatardy júrgen aq halattylar aldymen ózderi vaktsına qabyldap, otbasy amandyǵy úshin durys sheshim shyǵarǵanyn aıtyp berdi.
«Emhanaǵa adam kóp keledi. Olardyń arasynda koronavırýs ınfektsııasy belgileri bar naýqastar da bar. Sondyqtan jaqyndarymdy, eń aldymen otbasymdy dertten qorǵaý úshin vaktsına qabyldadym. Úıde jasy 70-den asqan ata-anam bar. Úsh balamnyń da aman júrgenin qalaımyn», - dedi №3 Aqtóbe qalalyq emhanasynyń bólim meńgerýshisi Roza Nurjanova.
Aıta keteıik, Aqtóbe oblysyna barlyǵy 1 myń doza jetkizildi. Qazir 700-den astam medıtsna qyzmetkeri ekpe qabyldap úlgerdi. Olar: jedel járdem, ınfektsııalyq statsıonar jáne emhana qyzmetkerleri.
Eske salsaq, 1 aqpannan bastap Qazaqstanda jappaı vaktsınalaý bastaldy. Tegin medıtsınalyq kómektiń kepildik berilgen kólemi aıasynda qazaqstandyqtarǵa koronavırýsqa qarsy egý tegin júrgiziledi.
Koronavırýspen aýyrǵan adamnyń antıdeneler tıtri joǵary bolsa jáne uzaq ýaqyt saqtalsa, vaktsına salýdyń qajeti joq. Al eger antıdene tıtri ýaqyt óte kele tómendese nemese tórtinshi, altynshy aıda nólge deıin tússe, onda ımmýndaý máselesi týyndaýy múmkin.
Vaktsınalaý týraly tolyq aqparatty QazAqparat agenttiginiń arnaıy aıdarynan oqýǵa bolady.
