Aqtóbelik búldirshinniń anasy 4 jyldan keıin Astanadan tabyldy
AQTÓBE. QazAqparat - Aqtóbede 5 jasar Ásemgúl Orazymbettiń týǵan ata-anasy tabyldy. Anasy ony 4 jyl buryn bala kútýshisine tastap ketken, dep habarlaıdy QazAqparat tilshisi Óńirlik kommýnıkatsııalar qyzmetine silteme jasap.
Bilim basqarmasynyń málimetinshe, 2015 jyldyń tamyz aıynda anasy 1 jasar qyzyn bala kútýshisi Marıana Foteksaǵa qaldyryp ketken. Osy ýaqytqa deıin bala bótenniń tárbıesinde boldy. Alǵashynda bala kútýshisi bolyp, keıin balany alyp qalǵan Marıana Foteksa turmysta, 3 ul tárbıelep otyr.
«Qyzdyń ata-anasy Astanada turady eken. Aqtóbe qalalyq bilim bólimi Astana qalasynyń Almaty aýdandyq bilim bóliminiń qorǵanshylyq jáne qamqorshylyq organyna suranys joldady. Telefon arqyly sóılesý barysynda áıel tórt jyl buryn otbasy jaǵdaıyna baılanysty qyzyn kútýshige qaldyrýǵa májbúr bolǵanyn aıtty. Qyzdyń ákesi de Astanada turady. Ásel Pirmanova osy aptanyń ishinde balany otbasyna alyp ketetinin jetkizdi», - dep habarlady oblystyq Bilim basqarmasynan.
Aıta keteıik, qazir Ásemgúl Orazymbet «Aıala» balalardy qoldaý ortalyǵyna ýaqytsha ornalastyryldy. Onymen psıhologtar jumys istep jatyr.
