Aqtóbelik belsendiler qala mańyndaǵy aýyldarǵa jol salýdy surady

Aqtóbe qalasyndaǵy kólik keptelisin azaıtý maqsatynda jolaıryqtar men kópirler salynady. Qalalyq ákimdik aldaǵy 3 jylǵa jobalyq-smetalyq qujat daıyndap qoıǵan. Barlyǵy 40 joba úshin 11,8 mıllıard teńge kerek. Alaıda bıýdjette bul qarjy joq. Sondyqtan memlekettik-jekeshelik áriptestik aıasynda ınvestor tabý qajet.

«Aqtóbe qalasynda 650 shaqyrymnan astam jol bolsa, onyń teń jartysynda ǵana asfalt bar. 2019 jyly 18 joba aıasynda 4,2 mıllıard teńge bólinip, ıgerildi. Jyl sońyna deıin 33 shaqyrym jol jóndeletin bolady. Aldaǵy jyldary biz usynǵan 40 joba iske asyrylsa paıyzdyq kórsetkish 80-ge jetedi», - dedi Aqtóbe qalalyq turǵyn úı-kommýnaldyq sharýashylyq, jolaýshylar kóligi jáne avtomobıl joldary bóliminiń basshysy Nurlan Dosov.

Sondaı-aq 40 jobany bir jylda iske asyrý múmkin emestigi ashyq aıtyldy. «Qala joldarynyń problemasyn 1-2 kósheni jóndep sheshe almaımyz. Sondyqtan ınvestor shaqyryp, olardyń úsh jylda qalany tolyq asfalttaýyn surap etip otyrmyz. Memlekettik-jekeshelik áriptestik usynystary da qaralady. «Jomarttyń qolyn joqtyq baılaıdy» degen bar. Eger jospar boıynsha ınvestor kelmese bıýdjetke suranys beremiz», - dedi ákimi Mavr Abdýllın.

Jıyn kezinde qoǵam belsendileri tek qala ishin emes, aýyldyń da máselesin nazardan tys qaldyrmaýdy talap etti.

«Qala irgesindegi Keńes Nokın aýylynda eki kóshege qıyrshyq tas tósep berdi. Al qalǵan kóshelerdiń bári balshyq kúıinde jatyr. Aýyldyń ortasynda orta mektep bar. Balalardyń mektepke barýy úlken problema bolyp tur. Baryńyz da kórińiz. Depýtattar men qala ákimdigin shaqyramyn. Eń bolmaǵanda tas tósep berińizdershi», - dep ótindi qoǵam belsendisi Erbolsyn Kóbenov. Bul usynys boıynsha aldaǵy ýaqytta qıyrshyq tas tóselýi múmkin. Bıyl qıyrshyq tas jetkizilse, keler jyly asfalt jamylǵysyn tóseý arzanǵa túsýi yqtımal.

Aıta keteıik, qalada jol jóndeý jumystaryn durys júrgizbegen bir kompanııany ákimdik sotqa berdi. Ázirge sot sheshimi shyqqan joq.