Aqtóbelik Baýyrjan Qanıev Senatqa saılaýda jeńiske jetti
Oblysy boıynsha Parlament Senatynyń depýtattyǵyna eki úmitker tirkelgen bolatyn: Shalqar aýdanynyń ákimi Baýyrjan Qanıev jáne oblystyq kásipodaq tóraǵasy Altynbek Ámirǵalıev.
Saılaý Aqtóbedegi «Óner ortalyǵynda» ótti. Daýys berýge barlyǵy 200-ge jýyq máslıhat depýtaty qatysty.
Saılaý qorytyndysy boıynsha Baýyrjan Qanıev - 143, Altynbek Ámirǵalıev 36 daýys jınady.
«2020 jyldyń 13 maýsymy men 12 shildesi aralyǵynda oblystyq saılaý komıssııasyna 6 ótinish tústi. Olardyń arasynda kásipkerler de, jumyssyz da boldy. Tek úsheýi resmı tirkelip, bireýi óz kandıdattyǵyn alyp tastaýǵa qaıta ótinish túsirdi. Kandıdat Qudaıbergen Bekenov saılaýǵa qatyspady», - dedi oblystyq saılaý komıssııasynyń tóraıymy Gúlnár Kúnbaeva.
Aıta keteıik, saılaý kezinde sanıtarııa talaby qatań saqtaldy.
«Kire beriste barlyǵynyń dene qyzýy ólshenip, olarǵa ara qashyqtyqty saqtaý eskertildi. Sonymen birge daýys berý kezinde ár adamǵa bir qalam berildi. Bul da qaýipsizdik sharasy. Daýys berýshiler betperde taǵyp júrdi. Baqylaýshylar da óz jumysyn atqardy», - dedi G. Kúnbaeva.
