Aqtóbelik balasynyń sal bolyp qalýyna dárigerlerdi kinálap otyr

Aqtóbe qalasynyń turǵyny Elmıra Kýlmanova balasy Samǵat Qolbaıdyń týa bitti aýyrmaǵan, ekpelerdi de ýaqytyly qabyldaǵanyn aıtyp otyr.  Al 2018 jyldyń 1 qańtarynda kenetten oń qoly qurysyp, aýzy dirildedi. Dereý jedel járdem shaqyrylyp, balany qalalyq aýrýhanaǵa jetkizdi. Qabyldaý bóliminde balanyń aýzynda ushyq bar ekeni anyqtalyp, keıin sol jedel járdem brıgadasymen juqpaly aýrýlar aýrýhanasyna jiberildi.

«Aýrýhanaǵa túsken ýaqytta Jańa jyl bolyp, dárigerler bizdi qaramady. Janymyzda medbıkeler boldy, biraq olar em jasamady. Olar bar bolǵany tynyshtandyratyn ekpe jasap ketedi. Bir saǵattan soń qaıta bastalady. Bir kúnnen soń ǵana, jansaqtaý bólimine jatqyzýǵa sheshim qabyldady. Nevropatolog shaqyrylǵanymen, ol da birden kelmedi. Ol bolmaǵan oń qaıta palataǵa jatqyzyp, birer saǵattan soń qabyldaý júrgizdi. Sol kezde «julynnan suıyqtyq alý kerek» dep aıtty. Keıin dálizge shyǵaryp jiberdi. Arada 10 mınýt ótip, balamdy qaıta ózime aldym. Biraq ulym sulq jatyp qaldy. Sodan ońalmady, qaıta qalpyna kelmedi. «Bári jaqsy» dep aıtqanymen, sýdan basqany ishpedi, embeı qaldy. Janym qınalǵan soń uıaly telefon arqyly jedel járdem shaqyrdym. Sol kezde ýchaskelik dárigerim de keldi. 3 qańtarda jansaqtaý bólimine taǵy jatttyq»,- dedi Elmıra Kýlmanova.

Keıin Samǵat Qolbaı juqpaly aýrýlar aýrýhanasynan shyǵarylyp, sýyq tıip, oblystyq balalar aýrýhanasyna jatqyzyldy. Aýrýhanadan úıine kelgende bala tósekte sulq jatyp qalǵan.

«Qoly salbyryp, beli ustamaı qaldy. Dárigerler entsefalıt dıagnozyn qoıyp berdi. Bir aıyptysy, olar julynynan suıyqtyq alar kezde saldaryn aıtyp, túsindirmedi. Eger dál osyndaı jaǵdaı bolatynyn bilgende suıyqtyq aldyrmaıtyn edim. Aýrýhanada uzaq emdelgen soń úıge keldim, qyzýy jıi kóterilip, jedel járdem shaqyra berdim. Sol kezde «Nur Otan» partııasyna baryp, kómek suradym. Olar «Úmit» sábıler úıine ýaqytsha tapsyrýdy, onda memleket tarapynan jan-jaqty em kórsetiletinin túsindirdi. Sóıtip 20 aqpanda tapsyrdym. Qazir jaǵdaıy qalypty, biraq beli ustamaıdy»,- dedi Elmıra Kýlmanova.

Balasynyń jany qınalǵanyn kórgen ana keıin prokýratýraǵa aryz jazdy. Aqtóbe qalalyq prokýrory R.Salkenov oblystyq densaýlyq saqtaý basqarmasynyń basshysy Áset Qalıevten kelgen jaýapty joldady. Onda Samǵat Qoldaýdyń 1-12 qańtar aralyǵynda oblystyq juqpaly aýrýlar aýrýhanasynda em qabyldaǵany, alǵashynda «gerpesti menıngoentsefalıtten keıingi jaǵdaı» dıagnozymen em qabyldaǵany jazylǵan.

«Balada mımıkalyq bulshyq etteriniń qurysý sındromy bolýyna baılanysty nevropatolog qarap, «Toksıkalyq entsefalopatııa. Fokaldy qurysý ustamasy» dıagnozyn qoıdy. Bas mıyna kompıýterlik tomografııa jasaýǵa jáne julyn suıyqtyǵyn tekserýge keńes berilgen. Komıssııa sheshimi boıynsha, QR DSM-niń klınıkalyq hattamalaryna sáıkes «Toksıkalyq entsefalopatııa» dıagnozynda julyn suıyqtyǵyn zertteý mindetti dıagnostıkalyq tekserý túri bolyp tabylady. Balalar suıyqtyq alý kezinde túsindirý jumystary júrgizilgen, alaıda jazbasha kelisim alynbaǵan. Oblystyq juqpaly aýrýlar aýrýhanasynyń dárigerleri tarapynan jumysty uıymdastyrý barysynda jiberilgen qatelikter balanyń densaýlyǵyna zııan keltirmegen. Degenmen, jiberilgen kemshilikter úshin qarqyndy em bóliminiń dáriger reanımatologi T.Jylqybaevqa qatań sógis jarııalandy»,- dep jazǵan oblystyq densaýlyq saqtaý basqarmasynyń basshysy Á.Qalıaev.

Óz jaýabynda densaýlyq saqtaý basqarmasynyń basshylyǵy balanyń ata-anasyna arnaıy keńes berilgeni, ońaltý jumystary tegin júrgiziletinin týraly jazǵan.

Óz retinde, Elmıra Kýlmanova balanyń tolyq saýyǵyp ketýi úshin ony Koreıada tegin emdetýdi talap etip otyr. Ol sotqa aryz túsirdi. Balany aqyly bólimge kórsetip, ózge dárigerlerdiń emin alýǵa otbasynyń áleýmettik jaǵdaıy kótermeıdi.

Búginde E.Kýlmanova aptasyna bir ret sábıler úıindegi balasyn kórýge baryp turady.