Aqtóbelik balanyń aýrýhanaǵa menıngokokk juqpasymen túskeni rastaldy
AQTÓBE. QazAqparat - Osy jyldyń 10 maýsymynda «menıngokokk juqpasymen tústi» degen kúdikpen aýrýhanaǵa jetkizilgen balanyń dıagnozy rastaldy, dep habarlaıdy QazAqparat tilshisi QR Densaýlyq saqtaý mınıstrligi Qoǵamdyq densaýlyq komıtetiniń baspasóz qyzmetine silteme jasap.
«Qazirgi ýaqytta naýqas Oblystyq klınıkalyq ınfektsııalyq aýrýhananyń jan saqtaý bólimshesinde emin jalǵastyryp jatqanyn habarlaımyz. Balanyń jaǵdaıy turaqty. Dınamıkada densaýlyǵy jaqsaryp kele jatqany baıqalady. Onymen jaqyn júrgen barlyq adamdar tekserildi. Olarǵa medıtsınalyq baqylaý ornatyldy. Tekserý qorytyndylary teris bolyp shyqty. Oshaqta epıdemııaǵa qarsy sharalar tolyqqandy júrgizilip jatyr», - delingen habarlamada.
Eske sala ketsek, búgin túske taıaý Qazaqstanda 2018 jyldyń basynan menıngokokk ınfektsııasynyń 59 jaǵdaıy tirkelgeni habarlanǵan bolatyn. Onyń ishinde 14 jasqa deıingi balalar arasynda - 21 jaǵdaı anyqtalyp, onyń 12-si ólimmen aıaqtalǵan (Almaty qalasynda - 6 jaǵdaı, Almaty oblysynda - 3 jaǵdaı, Ońtústik Qazaqstan oblysynda - 2 jaǵdaı jáne Qyzylorda oblysynda - 1 jaǵdaı).
Jaǵdaı QR Densaýlyq saqtaý mınıstrliginiń baqylaýynda.
Aýrýdyń alǵashqy sımptomdary (tamaq qyzarý, dene qyzýynyń kóterilýi, bastyń aýyrýy, álsizdik) paıda bolǵan kezde dereý dárigerlerge júginip, nusqaýlardy muqııat oryndaý qajet.
Ártúrli kópshilik mádenı sharalarǵa qatysýdy, júzý basseınderine, saýda, oıyn-saýyq ortalyqtaryna barýdy shektep, jeke gıgıenany saqtaý kerek.
Jumys oryndarynda bólmelerdi jıi jeldetip, ylǵaldy tazalyq jumystaryn júrgizip otyrǵan abzal. Tek qaınaǵan nemese bótelkedegi sýdy qoldaný qajet. Tońý, ashyǵý, uıqynyń qanbaýy sekildi jaılardy boldyrmaýǵa tyrysý kerek.
Aýyryp em izdegennen, onyń aldyn alý áldeqaıda jeńil ekendigin este saqtaǵan jón.
