Aqtóbelik balalarǵa densaýlyǵyna qaýipti taǵamdar berilgen
AQTÓBE. QazAqparat - Aqtóbede balabaqsha men mektepterde balalardyń densaýlyǵyna zııandy taǵamdar berilgen. Bul derekti oblystyq qoǵamdyq densaýlyq saqtaý departamenti anyqtady, dep habarlaıdy QazAqparat tilshisi.
Aqtóbede balabaqshalar men mektepterde balalarǵa berýge tyıym salynǵan taǵamdar anyqtaldy.
Aqtóbe oblystyq qoǵamdyq densaýlyq saqtaý departamentiniń habarlaýynsha, 2018 jyly 3 derek tirkeldi. Qobda aýdanynda ornalasqan «Balaýsa» balabaqshasynda kremi bar kondıterlik ónimdi paıdalanǵan, sonymen qatar mektep ashanalaryn tekserý barysynda Mártók aýdanyndaǵy Shevchenko negizgi mektebi jáne Hazret orta mektebi ashanalarynda qýyrylǵan bálish satylǵany belgili boldy.
«Sanıtarııalyq talaptar buzylyp, jaýapty adamdarǵa ákimshilik quqyqbuzýshylyq hattama toltyryldy. Barlyǵy 120 myń teńgeden astam aıyppul salyndy. Mektepterde gazdalǵan, emdik jáne emdik-ashanalyq mıneraldyq sýdy, tátti alkogolsiz sýsyndardy, alkogolsiz energetıkalyq sýsyndardy, fast-fýdtar, keptirilgen, qytyrlaq nandy jáne aşy tuzdyqtar, ketchýptar, aşy dámdeýishterdi daıyndaýǵa jáne ótkizýge tyıym salynatyndyǵy týraly túsindirý jumystary júrgizildi», - dedi Aqtóbe oblystyq qoǵamdyq densaýlyq saqtaý departamentiniń baspasóz qyzmeti.
Eske sala keteıik, «Aınalaıyn» jekemenshik balabaqshasynyń tárbıeshisi dırektor ony soqqyǵa jyqqanyn málim etken bolatyn. Oǵan sebep, tárbıeshiniń mekemedegi «bylyqtardy» foto, vıdeoǵa túsirip, áleýmettik jelide jarııalaýy. Dırektor jelidegi aıyptaýlarmen kelispegen. Mekeme qyzmetin ýaqytsha toqtatty.
Keıin, bir top ata-ana bolǵan oqıǵa saldarynan balalarǵa moraldyq nuqsan kelgenin aıtyp, tólegen aqshalaryn qaıtarýdy talap etti.
Balalarǵa tamaq durys berilmeıtini, tósek oryndarynyń jetispeıtini týraly tárbıeshiniń aıyptaýlary jeke tekserilýde.
